საქართველოს რაგბის კავშირის ახლადარჩეულმა პრეზიდენტმა, სოსო ტყემალაძემ რადიო „Georgian Times“-ის ეთერში განაცხადა, რომ დაპირისპირების აღმოსაფხვრელად ირაკლი აბუსერიძეს, გოჩა სვანიძეს და ბაჩო ხურციძეს პრეზიდენტის თანამდებობაზე მამუკა გორგოძის კანდიდატურას სთავაზობდა.
ტყემალაძემ განმარტა, რომ ამ წინადადებით ის მამუკა გორგოძესთანაც მივიდა, თუმცა ვეტერანმა მორაგბემ შეთავაზებაზე უარი თქვა, მიზეზად კი საკმარისი გამოცდილების არქონა მოიყვანა.
„სამივე კანდიდატმა, ირაკლი აბუსერიძემ, გოჩა სვანიძემ და ბაჩო ხურციძემ კარგად იცის, მათთან თუ რამე საუბარი მქონდა, იყო, რომ როგორმე კონსტრუქციულ ჩარჩოებში ჩამოყალიბებულიყვნენ და სხვა ალტერნატიულ კანდიდატზეც ეფიქრათ. არ არის დასამალი, იყო მამუკა გორგოძეზეც საუბარი, თუმცა, მამუკამ ძალიან კარგად ახსნა, რომ ამისთვის ჯერ მზად არ იყო. სტკივა ის, რაც დღეს ქართულ რაგბიში ხდება, მაგრამ ამ გადაწყვეტილებით შეიძლებოდა დაეზარალებინა როგორც რაგბი, ისე საკუთარი თავიც. იყო რამდენიმე მიზეზი – მენეჯმენტს გამოცდილება სჭირდება, ნაკრებში ბიჭებთან ერთად თამაშობდა, ასევე ფინანსების მართვა და ა.შ. ადამიანი როცა ხედავს, რომ იმ მომენტში არ არის მზად, არ უნდა მიიღოს ეს გადაწყვეტილება. ამაშიც, მან თავისი ლეგენდარულობა, ქართველი მამაკაცის სიამაყე და ყველა სიკეთე გამოამჟღავნა. მისი უარი სამწუხარო იყო იმის გამოც, რომ ეს შეიძლებოდა ამ პრობლემის გადაწყვეტის სწრაფი გზა ყოფილიყო. მას შევპირდი, რომ თუ ამ ნაბიჯს გადადგამდა, მე გამგეობაში შევიდოდი და იქიდან მივეხმარებოდი, მაგრამ პირდაპირ მითხრა არ გამოვაო“, – განაცხადა სოსო ტყემალაძემ.
შეგახსენებთ, რომ რაგბის კავშირის საპრეზიდენტო არჩევნებზე, რომელიც 10 მარტს ჩატარდა გამარჯვება იოსებ ტყემალაძემ მოიპოვა. მან დელეგატების მხრიდან 43 ხმა მიიღო და ქართულ რაგბის მომდევნო 4 წლის განმავლობაში უხელმძღვანელებს.
პარალელურ რეჟიმში, ბოიკოტის რეჟიმში რჩება ირაკლი აბუსერიძის გუნდი, რომელიც არჩევნებს არალეგიტიმურად მიიჩნევს და საკუთრი სიმართლის დამტკიცებას ახლა სასამართლოს გზით ცდილობს.
შეგახსენებთ, რომ 30 დეკემბერს სარაგბო კლუბ „ლოკომოტივის“ ბაზაზე გამართულ საარჩევნო ყრილობაზე გამარჯვება ირაკლი აბუსერიძემ მოიპოვა. 1 კვირაში საჯარო რეესტრმა ვეტერან მორაგბეს პრეზიდენტად რეგისტრაცია შეუჩერა, მიზეზად კი წესდების შეუსაბამოდ ჩატარებული არჩევნები დაასახელა.
