ლეო მესიმ ,,კამპ ნოუზე” პრესკონფერენცია გამართა და კატალონიურ გუნდს დაემშვიდობა:
,,ამდენი წლის შემდეგ ძალიან რთულია… მთელი ცხოვრება აქ გავატარე, ამისთვის მზად არ ვარ. გასულ წელს მე და ჩემი ოჯახი დაგვარწმუნეს, რომ მთელ ცხოვრებას აქ გავატარებდით. თუმცა, დღეს ამ ყველაფერს უნდა დავემშვიდობო. მივდივარ ჩემს ცოლთან და 3 კატალონიელ-არგენტინელ შვილთან ერთად. მივდივარ ჩემი სახლიდან, თუმცა მადლიერი ვარ ყველაფერის, მადლობა ჩემს გუნდელებს, ყოფილ თანაგუნდელებს, გულშემატკვიარს.
13 წლიდან ბარსელონაში ვცხოვრობდი და ეს ჩემი სახლია. ძალიან ბევრი რამ მოხდა, ცუდი ამბებიც გადამხდა, მაგრამ ამ ყველაფერმა იმ ადამიანად ჩამომაყალიბა, რომელიც თქვენს წინ დგას. აქ მოსვლის დღიდან გუნდისთვის აბსოლუტურად ყველაფერს ვაკეთებდი. ვერასდროს ვიფიქრებდი, რომ ამ ქალაქს დავემშვიდობებოდი, ვერ წარმოვიდგენდი, რომ ეს დღე დადგებოდა. ვეღარ გავიგებ ,,კამპ ნოუზე” მყოფი გულშემატკივრის ხმას, რომელიც ჩემს სახელს სკანდირებდა.
დიდი მადლობა იმ სიყვარულისთვის, რომელსაც ადამიანებისგან ამდენი წლის განმავლობაში ვიღებდი. იმედი მაქვს, დავბრუნდები და ამ გუნდის წევრი ნებისმიერი ფორმით ვიქნები,” – განაცხადა მესიმ.
შეგახსენებთ, რომ კატალონიურმა გრანდმა ხუთშაბათს ლეო მესის წასვლა ოფიციალურად დაადასტურა. მიუხედავად კლუბისა და ფეხბურთელის ორმხრივი სურვილისა, არგენტინელ სუპერვარსკვლავთან ახალი კონტრაქტის გაფორმება შეუძლებელი გახდა.
ლიონელ მესიმ ბარსელონასთან ერთად 35 ტიტული მოიგო და 778 ოფიციალურ მატჩში 672 გოლი გაიტანა.
