ლაშა შავდათუაშვილმა ბუდაპეშტში გაშლილ ტატამზე ტრიუმფალურად იასპარეზა და მსოფლიოს ჩემპიონის ტიტულიც დამსახურებულად მოიპოვა.
ქართული ძიუდოს მდიდარ ისტორიაში ის პირველია, რომელსაც სრული კომპლექტი აქვს შეკრული ანუ ოქროს მედალი ევროპის ჩემპიონატზე, ოლიმპიურ თამაშებზე და მსოფლიოს პირველობაზე აქვს დასაკუთრებული.
ცხადია, უნგრეთის დედაქალაქში მიღწეული წარმატებით ბედნიერია თავად ჩვენებური ძიუდოისტიც.
„ძალიან ბედნიერი ვარ. მინდა ეს წარმატება მთელ საქართველოს მივულოცო. ყოველდღიურად ვცდილობ ვარჯიშებზე ბოლომდე დავიხარჯო და მაქსიმუმი გავაკეთო, რათა შემდეგ საერთაშორისო არენაზე წარმატებას მივაღწიო.
ძიუდო ჩემი ცხოვრებაა. მისით ვსულდგმულობ. მას ჩემთვის დადებითი ემოციები მოაქვს. მიყვარს კვარცხლბეკზე დგომა და ბედნიერი ვარ, რომ დღეს საქართველოს ჰიმნი ავაჟღერე და ქართული დროშა ავაფრიალე.
ბედნიერი ვარ, რომ მალე ჩემთვის მესამე ოლიმპიადაზე მივიღებ მონაწილეობას. ყველაფერს გავაკეთებ, რათა იქ წარმატებას მივაღწიო“ – ასეთი იყო ლაშა შავდათუაშვილის პირველი კომენტარი ბუდაპეშტური ტრიუმფის შემდეგ.
