რუსული „კრასნოდარის“ ინტერესის შესახებ შოთა არველაძე პირველ კომენტარს აკეთებს. 48 წლის სპეციალისტის კომენტარს რუსული სააგენტო, SportRBC.ru ავრცელებს:
„კრასნოდარი კარგი კლუბია და ჩემთვის ასეთ გუნდში მუშაობა საინტერესო იქნებოდა. ადრე შემოთავაზება ნამდვილად მქონდა, ახლა კი წინადადებით არავის მოუმართავს“, – განაცხადა არველაძემ.
რამდენიმე დღის წინ „კრასნოდარმა“ მთავარი მწვრთნელის პოსტიდან ბელარუსი სპეციალისტი, ვიქტორ გონჩარენგო გაათავისუფლა. არველაძისადმი რუსული კლუბის ინტერესი სიახლე არაა. რუსულ პრესაში ბოლო რამდენიმე თვის განმავლობაში არაერთხელ დაიწერა, რომ კლუბის ხელმძღვანელებს მთავარ მწვრთნელად ქართველი სპეციალისტის დანიშვნა სურდათ, თუმცა რუსეთის ჩემპიონატში წასვლაზე უარს თავად არველაძე ამბობდა.
ბოლო დღეებში კი აქტიურად იწერება, რომ 48 წლის სპეციალისტის „ჰალ სიტიში“ დანიშვნა ფაქტობრივად გადაწყვეტილია.
შეგახსენებთ, რომ შოთა არველაძე 2020 წლის იანვრის შემდეგ უმუშევარია. ბოლოს ის უზბეკეთში, ტაშკენტის „ფახთაქორს“ წვრთნიდა, მანამდე კი „კაიზერსპორში“, ქაზიმფაშაში, „ტრაბზონსპორსა“ და თელ-ავივის „მაკაბიში“ მუშაობდა.
