კიდევ ერთი მინიშნება – რონალდუ წასვლასთან ახლოს არის

როგორც ჩანს, ჭორები და მითქმა-მოთქმა, მიმდინარე სეზონის ბოლოს, კრიშტიანო რონალდუს „იუვენტუსიდან“ წასვლის შესახებ სულ უფრო ემსგავსება სიცხადეს.

პორტუგალიელი სუპერვარსკვლავის ტურინული გრანდის დატოვების ერთ-ერთი გასაღები კი მანქანებშია. გაგიკვირდათ? ძალიანაც ნუ დაიბნევით.

ყველას კარგად მოეხსენება, რომ ბურთის გორების გარდა, რონალდუს გატაცება სწორედაც რომ ავტომობილებია.

ჰოდა, როგორც ირკვევა, კრიშტიანომ ტურინიდან თავისი ავტოპარკი უკვე დაცალა. 36 წლის პორტუგალიელმა, სატრანსპორტო კომპანია Rodo Cargo დაიქირავა, რომელიც ლისაბონშია ბაზირებული. ყოველივე კი იმაზე მეტყველებს, რომ გავრცელებული ხმები რონალდუს ლისაბონის „სპორტინგში“ გადაბარგებასთან დაკავშირებით მალე რეალობად იქცევა.

ფეხბურთის მოყვარულთ ალბათ შეხსენება არ უნდა ესაჭიროებოდეს, რომ რონალდუმ თავისი დიდებული კარიერა სწორედ „სპორტინგში“ დაიწყო, საიდანაც 2003 წელს „მანჩესტერ იუნაიტედში“ გადავიდა.

პორტუგალიელ ფორვარდს ტურინულ გრანდთან კონტრაქტი 2022 წელს ეწურება.