ჩეჩნური წარმოშობის 26 წლის შვედმა UFC-ს მებრძოლმა, ხამზატ „ბორზ“ ჩიმაევმა, ყველასთვის მოულოდნელი განცხადება გააკეთა, მან კარიერის დასრულების შესახებ განაცხადა.
მინდა ყველას დიდი მადლობა გადავუხადო მხარდაჭერისთვის. ვფიქრობ, ეს დასასრულია. ვიცი, რომ ქამარი არ მომიპოვებია, მაგრამ ეს არაა მთავარი გამარჯვება ჩემს ცხოვრებაში. შესაძლოა, ამან გული დაგწყვიტოთ, მაგრამ ჩემი სხეული მეუბნება, რომ ეს დასასრულია. დიდი მადლობა ჩემს გუნდს და დიდი მადლობა UFC-ს, – დაწერა მებრძოლმა ინსტაგრამზე.
ხამზატის ამ განცხადებას UFC-ს პრეზიდენტი დეინა უაითი გამოეხმაურა. მან განაცხადა, რომ ახალგაზრდა მებრძოლმა პოსტი ემოციურ ფონზე გაავრცელა და ის ორგანიზაციიდან არსადაც არ მიდის.
ჩიმაევი UFC-ში სულ რაღაც ერთი წლის წინ გამოჩნდა და ორ თვეში 3 გამარჯვება მოიპოვა. შემდეგი ბრძოლა ჩიმაევს რეიტინგის მესამე ნომერთან, იამაიკური წარმოშობის ბრიტანელ ლეონ ედვარდსთან უნდა გაემართა, მაგრამ კორონავირუსის გამო ბრძოლა ორჯერ გადაიდო, ბოლოს კი საერთოდ ჩაიშალა.
შვედი აშშ-ში ცოტა ხნის წინ გაემგზავრა, სადაც ის კორონავირუსით გამოწვეულ გართულებებს მკურნალობს და როგორც ჩანს ამან მის ფსიქოლოგიურ მდგომარეობაზე ცუდად იმოქმედა.
