დიდი ალბათობით „ლივერპული“ საჩემპიონო რბოლას გამოეთიშება. მერსისაიდელებმა „ვესტ-ჰემთან“ ბწყინვალე გამარჯვების შემდეგ, 22-ე ტურში შინ „ბრაიტონთან“ სენსაციური მარცხი იწვნიეს – 0:1. ნიშანდობლივია, რომ „ლივერპული“ „ბრაიტონთან“ 1984 წლის შემდეგ პირველად დამარცხდა.
ბუნებრივია, ნირწამხდარი და იმედგაცრუებულია ინგლისის მოქმედი ჩემპიონის მთავარი მწვრთნელი იურგენ კლოპი. ის მატჩის შემდეგ პრესკონფერენციაზე ცდილობდა მარცხის მიზეზებში გარკვეულიყო.
„ღიმილის საფუძველი ნამდვილად არ მაქვს. რთულია ამ მარცხის მიღება. ერთ კვირაში ორი ძნელი მატჩი გვქონდა და დღეს ბიჭები მორალურად და ფიზიკურად გადატვირთულები ჩანდნენ. ხშირ შემთხვევებში ბურთს ადვილად ვკარგავდით და ამით მეტოქეს საქმეს ვუადვილებდით. ისინი მართლაც იდეალურად გამოიყურებოდნენ.
ბრაიტონმა დამსახურებულად მოიგო. ახლა ჩემთვის მნიშვნელოვანია გავაანალიზო თუ რატომ დაგვემართა ისა, რაც დაგვემართა. სამომავლოდ ეს ძალიან მნიშვნელოვანი იქნება. ფეხბურთელებს თავდაჯერებულობა აკლდათ. ამის მიზეზები უნდა ვეძიოთ“ – აღნიშნა ლივერპულის გერმანელმა სპეციალისტმა.
