ისეთი პირი უჩანს, რომ „ლივერპულს“ ჩემპიონთა ლიგის საგზურის მოპოვებაც სანატრელი გაუხდება. მერსისაიდელების კრიზისული პერიოდი გრძელდება. იურგენ კლოპის გუნდმა პრემიერლიგის მორიგ ტურში ქომაგები ისევ გააწბილეს და შინაურ კედლებში „ფულჰემთან“ 0:1 წააგეს. ეს „ლივერპულის“ ენფილდზე ზედიზედ მე-6 წაგება გახლდათ.
კრიჭაშეკრულია იურგენ კლოპიც, რომელიც მატჩისშემდგომ პრესკონფერენციაზე გაწბილებული იყო.
„ფულჰემი ბოლო პერიოდში საკმაოდ კარგად ათამაშდა, ხოლო ჩვენ პირიქით ცუდი დრო გვიდგას. მატჩის მიმდინარეობისას გარკვეული კორექტივების შეტანა ვცადე, მაგრამ ბიჭებმა ამის გათავისება ვერ მოასწრეს.
ზოგადად მატჩი კარგად დავიწყეთ და თითქოს ყველაფერს ვაკონტროლებდით, თუმცა გოლი ისეთ დროს გავუშვით რომ არ ვიმსახურებდით. სამწუხაროდ შემდეგ გათანაბრება ვეღარ მოვახერხეთ.
ფსიქოლოგიურად მძიმე პერიოდი გვაქვს, მაგრამ ერთი მოგება გვინდა და ბევრი რამ გამოსწორდება. ახლა ისიც არ ვიცით ჩემპიონთა ლიგაზე მოვხვდებით თუ ვერა.
ბიწებს გამარჯვება წყურიათ, მე ამას ვხედავ, მაგრამ შეცდომებს ვუშვებთ და შემდეგ ვეღარ ვასწორებთ“ – თქვა იურგენ კლოპმა.
