როგორც უკვე მოგახსენეთ, სარაგბო კლუბ „ლელოს“ დიდი დიღმის ბაზაზე, რაგბის კავშირის გამგეობის სხდომა იმართება, თუმცა იქ პრეზიდენტობის კანდიდატებს არ უშვებენ.
ამას გოჩა სვანიძე და ირაკლი აბუსერიძე აპროტესტებენ და ამბობენ, რომ ის არალეგიტიმურია.
საქართველოს ნაკრების ყოფილმა 9 ნომერმა და კაპიტანმა ირაკლი აბუსერიძემ Prime Sport-თან საკმაოდ საინტერესო დეტალი გაახმაურა:
„სპორტულად და ფინანსურად რაგბის კავშირი საშინელ მდგომარეობაშია, უკვე ქართული რაგბის დისკრედიტაცია ხდება. დღესაც „რაგბის ოჯახის“ წევრებისგან თავს იცავენ და არ გვიშვებენ, ეს კატეგორიულად მიუღებელია, ასეთი რამ არასდროს მომხდარა.
ეს ბაზა რაგბის კავშირის საკუთრებაა, მაგრამ სხდომა მთავარ ოფისში უნდა ტარდებოდეს, ვფიქრობ ეს არის პრობლემა.
ერთ-ერთმა კანდიდატმა (ბაჩო ხურციძე) მოიწერა აბსოლუტურად ურთიერთგამომრიცხავი განცხადება და ამის საფუძველზე აღმასკომი შეიკრიბა.
მათი მთავარი მიზანი ისაა, რომ როცა კლუბების უმრავლესობა მხარს არ უჭერთ, ასეთი რამეებით სიტუაციის არევა სცადონ.
მოსაწვევი არასდროს დაგვჭირვებია, რადგან ჩვენ ყოველთვის „ოჯახი“ ვიყავით, ერთმანეთისგან თავის დაცვა ვფიქრობ საჭირო არ უნდა იყოს, ეს მარაზმი და უბრალოდ სირცხვილია.
16 დეკემბრის გამგეობის სხდომა აბსოლუტურად ლეგიტიმური იყო, არ იყო დღეს კიდევ ერთის ჩატარების საჭიროება, თუმცა ერთი კანდიდატის უპასუხისმგებლო განცხადების გამო ეს ყველაფერი ხდება.
არსებობს რაღაც ვიწრო ჯგუფი, პირდაპირ გეტყვით, ამ კლუბის ხელმძღვანელს (ბათუ კევლიშვილი), სურს ყველაფერი თავის თავზე მოირგოს, ეს ძალიან გულდასაწყვეტია.“
