რაფაელ ბენიტესი კვლავ საქმეშია. გამოცდილ ესპანელ სპეციალისტს ხანგრძლივი უქმობის შემდეგ, მოედნის კიდესთან მდგარს ისევ ვიხილავთ და კვლავ პრემიერლიგაში.
შეგახსენებთ, კარლო ანჩელოტი მომავალი სეზონიდან მადრიდის „რეალს“ უთავკაცებს, მანამდე კი ის „ევერტონის“ დამრიგებელი გახლდათ.
ცხადია, განახლებულ სეზონს „ევერტონი“ მთავარი მწვრთნელის გარეშე ვერ შეხვდებოდა. გუნდის ბოსებიც დაფაცურდნენ და სასურველ კანდიდატურასაც მიაგნეს. რაფაელ ბენიტესმა ლივერპულურ გუნდთან 3 წლიან კონტრაქტს მოაწერა ხელი და ოფიციალურად საქმიანობას 5 ივლისიდან შეუდგება, როდესაც ფეხბურთელები შვებულებიდან დაბრუნდებიან.
ფეხბურთის მოყვარულთათვის შეხსენება საჭირო არ უნდა იყოს, რომ რაფაელ ბენიტესი თავის დროზე „ლივერპულს“ ავარჯიშებდა. „მერსისაიდელთა“ მთავარი მწვრთნელის რანგში მან ჩემპიონთა ლიგა, უეფას სუპერთასი და ინგლისის თასი მოიგო. ამიერიდან კი ის, „ლივერპულელთა“ გულშემატკივრებისთვის საძულველ გუნდში, თანაქალაქელ „ევერტონში“ იმუშავებს.
რაფაელ ბენიტესი გახდა მეორე სპეციალისტი,რომელსაც „ლივერპულშიც“ და „ევერტონშიც“ ექნება ნამუშევარი.
130 წლის წინ, უილიამ ბარკლიმ 1888 – 1889 წლებში „ევრტონს“ უხელმძღვანელა, ხოლო 1892-1896 წლებში „ლივერპულის“ მთავარი მწვრთნელი იყო.
