მილანური „ინტერის“ ყოფილი ნახევარმცველი, ფრედი გუარინი კოლუმბიის ქალაქ ენვიგადოში დააკავეს.
სამართალდამცველების მტკიცებით, გუარინი საკუთარ მშობლებს თავს დაესხა და კონკრეტულად მამას ფიზიკური შეურაცხყოფა მიაყენა.
34 წლის ფეხბურთელი ამჟამად კოლუმბიის ჩემპიონატის კლუბ „მილონარიოსში“ თამაშობს და რამდენიმე დღის წინ ხელმძღვანელობას დროებით გათავისუფლება სთხოვა, მიზეზად კი ოჯახური პრობლემები დაასახელა.
ფრედი გუარინი სხვადასხვა წლების განმავლობაში „ბოკა ხუნიორსში“, „სენტ-ეტიენში“, „პორტუში“ და მილანის „ინტერში“ თამაშობდა. „ნერაძურის“ შემადგენლობაში გუარინი 2012-2016 წლებში გამოდიოდა და საერთო ჯამში 108 მატჩი ჩაატარა, სადაც 15 გოლით გამოირჩა.
