იმერულ-კახური მშვიდობა

სააღდგომო შესვენების შემდეგ, ეროვნული ლიგის მე-12 ტური „სამგურალის“ და „თელავის“ მატჩით გაიხსნა და გუნდებიც ერთმანეთს მშვიდობიანად გაეყარნენ.

კახელები მთავარი მწვრთნელის პოსტიდან რევაზ გოცირიძის გათავისუფლების შემდეგ ისევ ვერ იგებენ, თუმცა არც აგებენ. „თელავმა“ მიჯრით მეორე ფრე ითამაშა. ისე კი თელაველები პირველი ტურში მოპოვებული გამარჯვების შემდეგ, ისევ მოგებას მონატრებულნი არიან.

მატჩი მომენტებით უხვად დახუნძლული არ ყოფილა, თუმცა გუნდებმა ერთმანეთში თითო-თითო გოლი კი გაცვალეს.

ანგარიში მე-11 წუთზე ირაკლი ლეკვთაძემ გახსნა და „სამგურალიც“ ასე დაწინაურდა, მაგრამ მეორე ტაიმის დასაწყისში, კერძოდ 54-ე წუთზე თელაველთაგან რევაზ ინჯგიამ გაათანაბრა და როგორც აღმოჩნდა მატჩის საბოლოო ანგარიშიც დააფიქსირა.

12 ტურის შემდეგ, „სამგურალი“ 13 ქულით მე-6 ადგილზეა, ხოლო „თელავი“ 8 ქულით ბოლოსწინა პოზიციაზე.