საქართველო-რუსეთის სარაგბო დაპირისპირებაზე სხვადასხვა ოპოზიციური ჯგუფების მიერ მოსალოდნელია გარკვეული პროვოკაციები – ამის შესახებ პარლამენტის სპორტისა და ახალგაზრდულ საქმეთა კომიტეტის თავმჯდომარემ, მიხეილ ყაველაშვილმა „რუსთავი 2“-თან საუბრისას განაცხადა.
როგორც „ქართულ ოცნებაში“ აცხადებენ, გეგმის მიხედვით, რუსეთის ნაკრების წევრების შეურაცხყოფის გარდა, განიხილება სასტუმროში ან მოედანზე შევარდნის ვერსიებიც.
„იგეგმება პროვოკაცია „ერთიანი ნაციონალური მოძრაობის“ ახალგაზრდული ფრთის მიერ – ასეთი ინფორმაცია მოვიდა, ეს არის სრულიად სამარცხვინო ფაქტი. ყველას აქვს შესაძლებლობა, რომ გამოხატოს ემოცია სტადიონზე და უგულშემატკივროს საკუთარ ნაკრებს, მაგრამ არაფრის დიდებით არ დავუშვებთ, რომ შეურაცხყოფა მიაყენონ სპორტსმენებს ან რაიმე სახის პროვოკაცია მოაწყონ და უხერხულ მდგომარეობაში ჩააყენონ ჩვენი მორაგბეები“, – ამბობს მიხეილ ყაველაშვილი.
შეგახსენებთ, რომ საქართველოსა და რუსეთის მორაგბეთა ნაკრებებს შორის შეხვედრა 27 თებერვალს, „დინამო არენაზე“ 18:00 საათზე გაიმართება.
