ალბათ შეამჩნევდით, რომ ბოლო პერიოდში ხვიჩა კვარაცხელიას ყველაზე აქტიურად ინგლისის პრემიერ ლიგას, კერძოდ კი „ლიდსს“ უკავშირებენ. ჭორებმა, რომლის მიხედვითაც კვარას კარიერა იტალიის სერია A-ში, ან ესპანეთის ჩემპიონატში უნდა გაეგრძელებინა თითქოს მიიძინა და ახლა ასპარეზზე ყველაზე აქტიურად „ლიდს იუნაიტედის“ ვარიანტი განიხილება.
ცოტა ხნის წინ ხვიჩას ტრანსფერთან დაკავშირებით კიდევ ერთი სტატია დაწერა ცნობილმა ბრიტანულმა სააგენტო HITC-მა, რომელმაც 20 წლის ფეხბურთელის ბედი კვლავ „ლიდსს“ დაუკავშირა და აღნიშნა, რომ ინგლისური კლუბის ხელმძღვანელებმა ტრანსფერის პროცესი დააჩქარეს.
„სიახლე არ არის, რომ ლიდს იუნაიტედი ხვიჩა კვარაცხელიას გადაბირებით აქტიურად არის დაინტერესებული. რუსეთში მისმა საფეხბურთო აგენტმაც განაცხადა, რომ ხვიჩა ინგლისის პრემიერ ლიგაში სათამაშოდ მზად არის. ქართველ ფეხბურთელს ევროპის ტოპ-ჩემპიონატების კლუბებსაც უკავშირებენ. როგორც ჩანს, რუბინი მის ტრანსფერს ხელს არ შეუშლის. ასე რომ, ის ახლოსაა კარიერის ტრანსფერთან.
დიდი ინტერესის გამო ლიდსმა მოლაპარაკებები დააჩქარა. რა თქმა უნდა ტრანსფერამდე ჯერ ძალიან შორია, მაგრამ, „ლიდსის“ საფეხბურთო დირექტორმა ვიკტორ ორტამ ღიად განაცხადა, რომ კლუბი ხვიჩას ყიდვით აქტიურად არის დაინტერესებული. მან პირადად გამართა მოლაპარაკება ყაზანური გუნდის წარმომადგენლებთან. ძალიან დიდი შანსია, რომ ახალი სეზონიდან ფეხბურთელმა ტატარსტანის რესპუბლიკა დატოვოს და სათამაშოდ დასავლეთ იორკშირის გორაკებში გადაინაცვლოს“, – წერს HITC-ის ჟურნალისტი.
