გორის დილამ სამტრედია დაამარცხა

ეროვნული ლიგის მე-20 ტურში ეროსი მანჯგალაძის სახელობის სტადიონზე გორის „დილა“ სამტრედიას ესტუმრა და მინიმალური სხვაობით, 1:2 დაამარცხა.

პირველ ტაიმში ორივე გუნდი გარკვეულწილად აქტიურობდა, თუმცა გოლის გატანა ვერ შეძლეს და ტაიმი ნულოვანი ფრით დასრულდა.

მეორე ნახევარში ანდრეი დემჩენკოს გუნდმა მეტოქეზე ზეწოლა გააძლიერა და 50-ე წუთზე ღუდუშაურის პასით თორნიკე კაპანაძემ ანგარიში გახსნა. გოლის შემდეგ იმერლებს არეულობა დაეტყოთ და ზუსტად 3 წუთში ალეფის წინააღმდეგ წესების დარღვევის გამო თერთმეტმეტრიანი დაინიშნა, რომელიც უსმან კამარამ გოლად აქცია. სამტრედიელებმა 82-ე წუთზე ერთი ბურთის გაქვითვა მოახერხეს და საბოლოო ანგარიში, 1:2 დააფიქსირეს.

ანდრეი დემჩენკოს გუნდმა ამ გამარჯვებით ეროვნულ ლიგაში 32 ქულა დააგროვა და მე-4 ადგილზე აღზევდა, რაც შეეხება გია ცეცაძის გუნდს მათი მოუგებელი სერია გრძელდება და 10 ქულით ტურინირის აუტსაიდერის წოდებას ინარჩუნებენ.

გორის „დილა“ შემდეგ ტურში საკუთარ მოედანზე ლოკომოტივს მიიღებს, „სამტრედია“ კი ქობულეთის „შუქურას“ ესტუმრება.