წინა მატჩებისგან განსხვავებით, ამჯერად ნაკლები სათამაშო დრო მიეცა გოგა ბითაძეს, მისმა „ინდიანა პეისერსმა“ კი ეროვნული საკალათბურთო ასოციაციის რეგულარულ გათამაშებაში ზედიზედ მეორე მარცხი განიცადა.
„ინდიანა პეისერსი“ აღმოსავლეთ კონფერენციის ლიდერ „ფილადელფიასთან“ საინტერესო და დაძაბულ ბრძოლაში 110-119 დამარცხდა.
საქართველოს ნაკრების ცენტრმა პარკეტზე თითქმის 6 წუთი გაატარა და ამ დროში თავი ოდენ 3 ქულას, ერთ მოხსნას და ერთ დაფარებას მოუყარა. დაგვეთანხმებით, დიდი ვერაფერი სტატისტიკაა, თუმცა ისიც ვთქვათ, რომ გოგას ტრავმა ახალი მოშუშებული აქვს და იმედია მომდევნო მატჩებში გაცილებით პროდუქტიული იქნება.
„ინდიანა პეისერსი“ 11 მოგებით და 9 წაგებით სატურნირო ცხრილში მე-5 ადგილზეა, ხოლო მომდევნო დაპირისპირება 3 თებერვალს „მემფის გრიზლის“ წინააღმდეგ ელის.
