საქართველოს ნაკრები მსოფლიო ჩემპიონატის შესარჩევი ეტაპის მესამე მატჩს უქულოდ ხვდება. სამწუხაროდ, ჯვაროსნებმა შვედეთთან და ესპანეთთან დასანანი მარცხები განიცადეს.
დღეს, ჩვენი ეროვნული გუნდი სალონიკში საბერძნეთის ნაკრებს დაუპირისპირდება, რომელიც ამ მატჩს დასვენებული ხვდება. ელადელებს 25 მარტის შემდეგ აღარ უთამაშიათ და აღდგენისთვის მეტი დრო ჰქონდათ.
გიორგი ჭიაბრიშვილის მოსაზრებები ფეხბურთის მოყვარულთათვის ინტერესმოკლებული არასოდეს ყოფილა. ახალგაზრდა ქართველი სპეციალისტი გადაცემა „ტაიმაუტის“ სტუმარი იყო და ვილი სანიოლის სადებიუტო მატჩები შეაფასა.
„რთულია ასე მოკლე დროში მწვრთნელის მუშაობა ზედმიწევნით შეისწავლო ან შეაფასო, მაგრამ მაინც თვალშისაცემი რაც იყო არის ის, რომ ნაკრებში ფეხბურთელთა რაოდენობა გაიზარდა, რაც ძალიან დადებითი ამბავია. ასევე მივესალმები ეროვნული ლიგიდან ფეხბურთელთა გამოძახებასაც და ეს ტენდენცია აუცილებლად უნდა გაგრძელდეს.
ჩაბრაძის მაგალითზე გამოჩნდა, რომ ეროვნულ ლიგაში მოთამაშე ფეხბურთელებსაც შეუძლიათ ნაკრებში უმაღლეს დონეზე თამაში. ეროვნული ჩემპიონატისთვის ეს კარგი მესიჯია.
მე დავინახე გუნდი, რომელმაც იცოდა მოედანზე რა უნდა გაეკეთებინა. ეს უპირველესად მწვრთნელის დამსახურებაა. გუნდი მწყობრად მოქმედებდა. ვფიქრობ, სანიოლის ფეხბურთელებისთვის პოზიციები სწორად აქვს შერჩეული.
ვილი სანიოლი თვითონ წარმატებული ფეხბურთელი იყო და ეს მუხტი მწვრთნელობაშიც გადაყვა. ამიტომაც არ მიკვირს, რომ ნებისმიერ მეტოქესთან მოგებაზეა ორიენტირებული.
წინა მწვრთნელმა რაღაც დონემდე მიგვიყვანა, მაგრამ გადამწყვეტი მატჩი ვერ მოიგო. ამიტომაც ყველაფერი წყალში ჩაიყარა. ასეთია მწვრთნელის ხვედრი.
სანიოლის ბევრმა ქომაგმა შეცვლები დაუწუნა. უფრო სწორად კვარაცხელიას გაყვანა. კი, ჩვენ ხვიჩას შემცვლელი არ გვყავს, მაგრამ მედალს ორი მხარე აქვს. შეუძლია მას ასე მოკლე პერიოდში 3 მატჩის უმაღლეს დონეზე გამართვა? ძალების გადანაწილებაა საჭირო.
ძალიან რთული გრაფიკით დავიწყეთ და დაღლილობა რა თქმა უნდა იქნებოდა. ნიჭით არც ხორვატებზე ნაკლები ვართ და არც სხვა ერზე, მაგრამ მარტო ამით ფონს ვერ გავალთ. ფიზიკურ გამძლეობას დიდი მნიშვნელოვა ენიჭება“ – აღნიშნა თბილისის „ლოკომოტივის“ მთავარმა მწვრთნელმა.
