გიორგი მიქაუტაძემ ბელგიურ „სერენსში“ თავისი მოვალეობა პირნათლად შეასრულა, გუნდი ბელგიის ჩემპიონატის უმაღლეს ლიგაში გადაიყვანა და იქაურობაც ვალმოხდილმა დატოვა.
ქართველი ფეხბურთელი ფრანგულ „მეცს“ დაუბრუნდა და მომავალ სეზონს უკვე ლიგა 1-ში ითამაშებს. მიუხედავად იმისა, რომ მიქაუტაძემ ბელგია დატოვა, ახალგაზრდა და ნიჭიერი ქართველი ფეხბურთელის მიმართ იქაური მედია ინტერესს კვლავ ამჟღავნებს.
ერთ-ერთმა გამოცემამ გიორგი მიქაუტაძესთან ვრცელი ინტერვიუ აიღო, თუმცა ჩვენ მხოლოდ იმ ამონარიდს შემოგთავაზებთ, სადაც ქართველი ფეხბურთელი მარტის მატჩებში ნაკრებში გატარებულ პერიოდზე და შვედეთთან დაპირისპირებაზე საუბრობს.
„პირველ რიგში ავღნიშნავ, რომ არ ვნანობ არჩევანი საქართველოს ნაკრებზე რომ გავაკეთე. ჩემი ოჯახიც ამის გამო ძალზედ მოხარულია.
ეროვნული ნაკრების მაისურით თამაში უკვე მოვასწარი, როდესაც შვედეთის წინააღმდეგ მწვრთნელმა შეცვლაზე შემიშვა. ზლატან იბრაჰიმოვიჩი ფანტასტიკური ფეხბურთელია, თუმცა თავის იმიჯს არ ღალატობდა და ჩვეულ ამპლუაში იყო. მუდამ ცდილობდა ყველას წაკამათებოდა, მსაჯს მუდამ საყვედურობდა. მოკლედ, მისდამი მოედანზე მოწიწებას და პატივისცემას არ გამოვხატავდით, ხოლო მატჩის შემდეგ ზლატანისთვის მაისურიც გაცვლა არც მიცდია“ – ამბობს გიორგი მიქაუტაძე ბელგიურ მედიასთან საუბარში.
