სად გააგრძელებს კარიერას ხვიჩა კვარაცხელია? ეს კითხვა არა მხოლოდ ქართველ გულშემატკივარს და მედიას, უცხოურ გამოცემებსაც აწუხებთ და სხვადასხვა ვერსიებსაც გვთავაზობენ.
ბოლო პერიოდში, უფრო კონკრეტულად კი 24 საათია აქტიურად მუსირებს ინფორმაცია 20 წლის ქართველი ტალანტის „იუვენტუსში“ გადაბარგებასთან დაკავშირებით. იტალიურმა მედიამ კვარაცხელია უკვე ტურინული კლუბის წევრადაც მონათლა. დასახელებულია სატრანსფერო თანხაც – 20 მილიონი ევრო.
ამასობაში, აპენინური მედია კიდევ ერთ საინტერესო ამბავს ავრცელებს. ხვიჩა კვარაცხელია მომავალი სეზონიდან „იუვენტუსში“ იმ შემთხვევაში გადავა თუ ტურინელები ჩემპიონთა ლიგის საგზურს მოიპოვებენო. სხვაგვარად შეთანხმება არ შედგება და ხვიჩაც „იუვენტუსის“ მაისურს არ მოირგებსო.
ძნელი სათქმელია და თავსაც ვერ დავდებთ თუ რამდენად შეესაბამება ჩვენი იტალიელი კოლეგების მიერ გავრჩელებული ეს ამბავი, მაგრამ გვეეჭვება ეს ხვიჩა კვარაცხელიან პირობა ან ულტიმატუმი იყოს.
მოკლედ, დაველოდოთ მოვლენების განვითარებას. დიდი ალბათობით, ზაფხულის სატრანსფერო ფანჯრის გახსნამდე ხვიჩა კვარაცხელიას სახელს კიდევ არაერთ გრანდს დაუკავშირებენ და ადრე თუ გვიან ყვლაფერს ნათელი მოეფინება.
