ხვიჩა კვარაცხელიას მომავალი ბუნდოვანია. 20 წლის ნახევარმცველი, რომლის ევროპულ კლუბში ტრანსფერს მთელი საქართველო ელოდება, ჯერჯერობით ისევ ყაზანის რუბინში რჩება და ახალი სეზონისთვის ემზადება.
რუსული Eurosport წერს: “ხვიჩა კვარაცხელია რუბინში კიდევ ერთი სეზონი დარჩება. ყაზანელები ქართველ ფეხბურტელს 30 მილიონ ევროდ აფასებენ. უცხოური კლუბები ჯერ არ არიან მზად ამხელა თანხის გადასახდელად და ამის გამო, რუბინი ხვიჩას კიდევ ერთი სეზონით შეინარჩუნებს, რათა ფეხბურთელმა უფრო მეტად წარმოაჩინოს თავი და ასწიოს თავისი სატრანსფერო ფასი”.
ამავე საიტის ბლოგერმა და ავტორმა პაველ გოროდნიცკიმ კვარაცხელიას შესახებ თავის Youtube-არხზე ილაპარაკა, სადაც ახსნა, თუ რატომ არ გაყიდის რუბინი ამ ზაფხულს ხვიჩას.
“ხვიჩა კვარაცხელია რუბინიდან ამ ზაფხულს არ წავა, მიუხედავად იმისა, რომ რამდენიმე თვის წინ მამამისი ამბობდა, რომ “რუსეთში თამაშს აღარ ვაპირებთ” და ამით მიანიშნებდა, რომ ხვიჩა ზენიტში არ გადავიდოდა. მოგვიანებით ხვიჩას მამამ თავი იმართლა, რომ მას არასწორად გაუგეს.
რამდენადაც ჩემთვის ცნობილია, თავად ხვიჩაც ემზადებოდა ევროპაში წასასვლელად, მაგრამ როგორც ხდება ხოლმე – რეკავენ ევროპული კლუბების წარმომადგენლები რუბინში ან გზავნიან ფაქსებს, იქ კი პასუხობენ: “ხვიჩას 18 მილიონ ევროდ არ გავყიდით”. ეს იმიტომ, რომ რუბინს ხვიჩას უფრო ძვირად, მაგალითად, 30 მილიონად გაყიდვა სურს. კონტრაქტი 2024 წლამდე მოქმედებს და არ არის მისი გაყიდვის აუცილებლობა, რადგან ახალ სეზონში მან შეიძლება რუსეთის პრემიერლიგაში, ევროთასებზე გაიბრწყინოს და მომავალ ზაფხულს სულ სხვა თანხის სანაცვლოდ წავიდეს.
და ვის გაყიდის რუბინი? როგორც სიახლეებიდან ვიგებ, გაყიდიან კარლ სტარფელტს და ამ ფულით მშვიდად გააგრძელებენ ცხოვრებას ხვიჩასთან, სლუცკისთან და ჩემპიონთა ლიგაში მოხვედრის პერსპექტივასთან ერთად”, – აქვეყნებს გოროდნიცკის სიტყვებს Eurosport.ru.
