საქართველოს ფეხბურთელთა 21-წლამდე ნაკრებმა ბათუმი არენაზე ინგლისის ნაკრები სენსაციურად, შთამბეჭდავ თამაშში 3:2 დაამარცხა. აღნიშნულ დაპირისპირებაში რამაზ სვანაძის გუნდიდან ერთ-ერთი გამორჩეული გიორგი გოჩოლეიშვილი იყო, რომელმაც ინგლისელი თანატოლების წინააღმდეგ სოლო რეიდით ულამაზესი გოლი გაიტანა და ამასთან, საგოლე გადაცემაც მიითვალა.
ინგლისთან მატჩის შემდეგ, „პრაიმ სპორტი“ გიორგის დაუკავშირდა და ინტერვიუ ჩაწერა. მას ვესაუბრეთ როგორც ახალგაზრდულ ნაკრებზე, ისე კლუბზე და სამომავლო გეგმებზე.
– პირველ რიგში გილოცავთ გამარჯვებას. როგორი განწყობაა გუნდში, რის ხარჯზე მოხერხდა ამ რთული შეხვედრის მოგება?
– გუნდში ძალიან კარგი განწყობაა. ასეთი დონის მეტოქეს პირველად ვეთამაშეთ და მოხარული ვარ, რომ შეხვედრა ჩვენი გამარჯვებით დასრულდა. ფეხბურთელები ბოლომდე დავიხარჯეთ, რათა წარმატებას მიგვეღწია და შედეგიც, ჩემი აზრით სამართლიანი იყო. დაძაბული და სანახაობრივი მატჩი გამოვიდა, ინგლისს რაც შეეხება ძალიან კარგი ფეხბურთელებით არის დაკომპლექტებული და ესეთი დონის ფეხბურთელების დამარცხება ორმხრივად სასიხარულოა.
– იყო თუ არა თქვენთვის სიურპრიზი ინგლისის ნაკრებთან გამარჯვება?
– ყველას გაანალიზებული გვაქვს, რომ ევროპის ჩემპიონატზე მსგავსი გუნდები იქნებიან. რა თქმა უნდა, ასეთი გრანდის წინაშე თამაში ძალიან რთულია, მაგრამ დარწმუნებულები ვიყავით ჩვენს შესაძლებლობებში და ვიცოდით, რომ ამ მატჩში წარმატებას მივაღწევდით.
– შთამბეჭდავი გოლი გაიტანეთ! როგორი იყო ემოცია გოლის შემდეგ?
– ისეთი ემოცია იყო ნამდვილად ვერ აღვწერ. როდესაც ასეთი დონის გუნდს გოლს უტან, ორმაგად სასიხარულოა. ვთვლი, რომ ჩემს კარიერაში საუკეთესო გოლი იყო.
– რა გითხრათ რამაზ სვანაძემ ინგლისთან მატჩის წინ და როგორ შეაფასებდით მის მუშაობას ახალგაზრდულ ნაკრებში?
– გვითხრა, რომ მთავარი იქნებოდა ფსიქოლოგიური მდგომარეობა და დაგვეჯერებინა ჩვენი შესაძლებლობების. მის მუშაობას დადებითად შევაფასებდი და დარწმუნებული ვარ, მასთან ერთად კიდევ ბევრ წარმატებას მივაღწევთ.
– საქართველოს 21 წლამდელთა ნაკრების შანსებს 2023 წლის ევროპის ჩემპიონატზე როგორ შეაფასებდით?
– უნდა გავაგრძელოთ მზადება ევროპის ჩემპიონატისთვის და უნდა ვეცადოთ ის შეცდომები გამოვასწოროთ, რომლებიც აქამდე გვქონდა. ამ თამაშის შემდეგ კიდევ ერთხელ გამოჩნდა, რომ თამაში ნებისმიერ გუნდთან არის შესაძლებელი, თუნდაც ეს გუნდი ინგლისის ნაკრები იყოს.
– როგორ დაახასიათებდით ბათუმის ახალ სტადიონს და რას ეტყოდით ქომაგებს, რომლებიც ამ შეხვედრაზე მოვიდნენ?
– ძალიან კარგი ატმოსფეროა, ესეთ სტადიონზე თამაში ძალიან სასიხარულოა. რაც შეეხება გულშემატკივარს, ყველა მათგანს გვერდში დგომისთვის დიდ მადლობას ვუხდი.
– რომელ მატჩს გამოარჩევდით საქართველოს ეროვნული ნაკრების ისტორიაში?
– ყველაზე დამახსოვრებელი და გამოსარჩევი მატჩი, რაც ოდესმე მინახავს ხორვატიასთან გამართული შეხვედრაა. მოგეხსენებათ არ ვართ ხორვატიის დონის გუნდებთან გამარჯვებას მიჩვეული, ემოციას რაც შეეხება, ძალიან მაგარი გრძნობა იყო.
– რომელ ფეხბურთელს გამოარჩევდით საქართველოს ახალგაზრდული ნაკრებიდან?
– გამიჭირდება, რადგან ჩვენ ნაკრებს ერთი მეორეზე კარგი ფეხბურთელები ჰყავს და ერთი ოჯახივით ვართ, რაც წარმატების მიღწევაში გვეხმარება.
– როგორ დაახასიათებდით ქართული ფეხბურთის ერთ-ერთ პერსპექტიულ ფეხბურთელს, გიორგი მამარდაშვილს?
– გიორგისთან კარგი ურთიერთობა მაქვს, შრომისმოყვარე და მიზანდასახული ფეხბურთელია.
– როგორ შეაფასებდით ეროვნულ ლიგას და რა განსხვავებაა ჩვენ ჩემპიონატსა და შედარებით უფრო მაღალი დონის ჩემპიონატებს შორის?
– ადრინდელთან შედარებით კარგი შიდა ჩემპიონატი გვაქვს. ინფრასტრუქტურა და სხვა ბევრი რამ ძალიან განვითარდა. უფრო მაღალი დონის ჩემპიონატებისგან ეროვნული ლიგა ტემპით და სისწრაფეებით განსხვავდება.
– როგორ დაახასიათებდით „საბურთალოს“ და რა მიზნები აქვს გუნდს სამომავლოდ?
– საქართველოში ერთ ერთი საუკეთესო გუნდია. ამ კლუბის აღზრდილი ვარ და ერთი ოჯახივით ვართ. „საბურთალო“ ყოველთვის მაღალი მიზნებისთვის იბრძვის და არც მომავალი სეზონი იქნება გამონაკლისი. ჩემი მიზანიც რა თქმა უნდა კლუბთან ერთად წარმატების მიღწევაა.
– აპირებთ თუ არა კარიერის გაგრძელებას სხვა ქვეყნებში და გაქვთ თუ არა შემოთავაზებები უცხოური კლუბებიდან?
– კარიერის გაგრძელება რა თქმა უნდა უცხოეთში მსურს, მაგრამ ამ ეტაპისთვის სრულიად კონცენტრირებული ვარ „საბურთალოზე“ და მასთან ერთად დიდი მიზნების მიღწევაზე.
– ვინ იყო ფეხბურთელი, რომელმაც სპორტის ეს სახეობა შეგაყვარათ?
– ფეხბურთი ლეო მესიმ შემაყვარა, ის ჩემთვის მსოფლიოში საუკეთესო ფეხბურთელია.
