10-წლიანი პაუზის შემდეგ „გაგრა“ ეროვნულ ლიგაში დაბრუნდა. გაგა კირკიტაძის გუნდმა ორრაუნდიან დაპირისპირებაში შუქურა 1:0 დაამარცხა და ქვეყნის ჩემპიონატის უმაღლეს ლიგაში თამაშის უფლება დამსახურებულად მოიპოვა. თბილისის ზღვის ბაზაზე გამართულ გადამწყვეტ მატჩში ერთადერთი გოლი თამაზ მაქაცარიამ გაიტანა.
მთელი სეზონის განმავლობაში „გაგრაში“ ერთ-ერთი გამორჩეული ფეხბურთელი სანდრო შეწირული იყო. 22 წლის ნახევარმცველს „შუქურას“ წინააღმდეგ საპასუხო მატჩში მცველის პოზიციაზე მოუწია თამაში, თუმცა დაკისრებულ მოვალეობას თავი კარგად გაართვა და თავისი გუნდის წარმატებაში მნიშვნელოვანი როლიც ითამაშა.
„პრაიმ სპორტი“ სანდრო შეწირულს დაუკავშირდა და მასთან მცირე ინტერვიუ ჩაწერა:
– პირველ რიგში, გილოცავთ ეროვნულ ლიგაში აღზევებას. როგორ შეაფასებდით პლეი-ოფის მატჩებს?
– მადლობა. დადებითად შევაფასებ პლეი-ოფის მატჩებს. ძალიან რთული თამაშები იყო. „შუქურა“ ძალიან კარგი გუნდია, ამავდროულად, ქობულეთში გამართულ მატჩში მე-20 წუთიდან 10 კაცით დავრჩით, მაგრამ გოლი არ გავუშვით. მეორე თამაშში სწრაფი გოლი გავიტანეთ და საბოლოოდ, ამით მივაღწიეთ წარმატებს. ვფიქრობ, დამსახურებულად გავიმარჯვეთ.
– გამარჯვების ემოციებზე რომ გვესაუბროთ.
– ძალიან ემოციური დღე იყო, პირველ რიგში იმიტომ, რომ ამდენი ხნის შრომა დაფასდა. ემოციური იყო ჩვენი გულშემატკივრისთვისაც, რომლებიც არანაკლებ გავაბედნიერეთ.
– 2012 წლის შემდეგ „გაგრა“ ეროვნულ ლიგაში პირველად იასპარეზებს, როგორ ფიქრობთ, რა შანსები გექნებათ მომავალ სეზონში საქართველოს ჩემპიონატში?
– ძალიან დიდ კონკურენციაში ჩავერთვებით. არ იქნება ის ფაქტორი, რომ დაბალი ლიგიდან ამოვედით. გპირდებით, რომ ბრძოლისუნარიანი გუნდი ვიქნებით და ვეცდებით, რაც შეიძლება მაღალ პოზიციაზე დავასრულოთ ჩემპიონატი.
– როგორ ფიქრობთ, რის ხარჯზე მიაღწიეთ ამ წარმატებას?
– ეს წარმატება შრომისა და ერთიანობის შედეგია და რა თქმა უნდა ბრძოლის რის ხარჯზეც დავწინაურდით ეროვნულ ლიგაში.
– როგორ შეაფასებდით კლუბში გაგა კირკიტაძის მუშაობას?
– გაგა კირკიტაძე ძალიან კარგი მწვრთნელია. მონდომებული, კარგი მოტივატორი და მიზანდასახული რა თქმა უნდა მისი დიდი დამსახურებაა ეს შედეგი.
– ეროვნულ ლიგა 2-ში ჩატარებულ სეზონს როგორ შეაფასებდით?
– ეროვნული ლიგა 2-ში ჩატარებულ სეზონს დადებითად შევაფასებ, მიუხედავად იმისა, რომ პირველი ადგილით ვერ დავამთავრეთ ასპარეზობა, რასაც ჩემი აზრით ვიმსახურებდით რამოდენიმე უიღბლობა, რომ არ ყოფილიყო.
– გასულ სეზონში კონფერენს ლიგის საკვალიფიკაციო ეტაპზე იასპარეზეთ, ახლა კი ეროვნულ ლიგაში განაგრძობთ ასპარეზობას, როგორ დაახასიათებდით გაგრას და რა მიზნები აქვს ამ კლუბს სამომავლოდ?
– ევროტურნირებმა ძალიან დიდი გამოცდილება მოგვცა და ძალიან ღირსეულად ვიასპარეზეთ. ვეცდებით, რომ კიდევ მოვხვდეთ და რაც შეიძლება მეტი ეტაპი გადავლახოთ.
– როგორ დაახასიათებდი გუნდის ბომბარდირსა და ერთ-ერთ ლიდერს თამაზ მაქაცარიას?
– თამაზ მაქაცარია უმაღლესი დონის ფორვარდია. ჩემი აზრით მთელს ეროვნულ ლიგაში საუკეთესოა, რაც ამ სეზონითაც კიდევ ერთხელ დაამტკიცა.
– რა არის თქვენი როგორც ფეხბურთელის მიზანი და ოცნება?
– ჩემი მიზანიც და ოცნებაც არის საქართველოს ნაკრებში თამაში ალბათ როგორც ყველა ფეხბურთელისთვის და იმედი მაქვს ამიხდება ეს ოცნება. ჩემი აზრით პირველი ოცნება ფეხბურთელისთვის საკუთარი ქვეყნის ნაკრებში თამაში უნდა იყოს.
– რას ეტყოდი გაგრას გულშემატკივარს?
– გაგრას გულშემატკივარს პირველ რიგში მადლობას ვეტყვი მთელი ამ დროის მანძილზე გულშემატკივრობისთვის, ყოველთვის ვგრძნობდით მათ გვერდში დგომას.
