არახალი ამბავია, რომ იოახიმ ლიოვი სულ მალე გერმანიის ნაკრების მთავარი მწვრთნელი აღარ იქნება. ლიოვი თანამდებობას ევროპის ჩემპიონატის შემდეგ დატოვებს და ეს მან უკვე დაადასტურა.
61 წლის გამოცდილი სპეციალისტი უმუშევრად ალბათ დიდხანს არ დარჩება. ის, რომ ლიოვს არაერთი მსურველი გამოუჩნდება ძნელი მისახვედრი არ უნდა იყოს.
პირველი შეთავაზება კი მან უკვე თურქეთიდან მიიღო. პოპულარული გამოცემა Bild იუწყება, რომ ჯერ კიდევ გერმანიის ნაკრების მოქმედ მწვრთნელს „ფენერბახჩე“ ეპატიჟება. ლიოვსაც მეგობრების წრეში ეს ამბავი განუხილავს და ამ წინადადებით უკმაყოფილო არ დარჩენილა.
შეგახსენებთ, იოახიმ ლიოვი სტამბოლურ გუნდში უკვე მუშაობდა. ის „ფენერბახჩეს“ 1998/99 წლების სეზონში წრთვნიდა და მისი თავკაცობით გუნდმა თურქეთის ჩემპიონატში მესამე ადგილი დაიკავა.
ვნახოთ, შევა თუ არა იოახიმ ლიოვი მეორედ ერთ მდინარეში.
