ორიოდ დღეში ტოკიოში ზაფხულის ოლიმპიური თამაშები იწყება. რომ არა ბედის უკუღმართობა და უიღბლობა ახლა ვლადიმერ ხინჩეგაშვილი იაპონიის დედაქალაქში უნდა იყოს და ზედიზედ მეორე ოლიმპიური ჩემპიონის ტიტულისთვის იბრძოდეს.
შეგახსენებთ, რიოს ოლიმპიური თამაშების ტრიუმფატორს ზედ ბოლო სალიცენზიო ტურნირის წინ, რომელიც ბულგარეთში გაიმართა კორონავირუსი დაუდასტურდა და შესაბამისად ვერც ტოკიოს საგზური მოიპოვა.
30 წლის თავისუფალი სტილით მოჭიდავე ვლადიმერ ხინჩეგაშვილი შესაძლოა პოლიტიკაში ვიხილოთ. ყოველშემთხვევაში ამ ინფორმაციას ავრცელებს რამდენიმე მედია საშუალება. საუბარია გორის მერობის კანდიდატობაზე. როგორც ამბობენ, გორში ქართული ოცნება სწორედ გამოჩენილი და წარმატებული ფალავნის წარდგენას აპირებს. ხინჩეგაშვილის კანდიდატურაზე პარტიის პოლიტსაბჭოს სხდომაზე იმსჯელეს და მას მხარიც დაუჭირესო.
ვლადიმერ ხინჩეგაშვილი თუ მართლაც გახდება გორის მერობის კანდიდატი ეს იმას ნიშნავს, რომ ევროპის, მსოფლიოსა და ოლიმპიური თამაშების ჩემპიონის სპორტული კარიერაც დასრულდება.
დაველოდოთ თუ როგორ განვითარდება მოვლენები. თვითმმართველობის არჩევნები საქართველოში 2 ოქტომბერს არის დანიშნული.
