ჯანლუიჯი ბუფონი რომ სეზონის ბოლოს „იუვენტუსს“ უკვე მეორედ დატოვებს ძველი ამბავია. ვეტერანმა კიპერმა ამის შესახებ თავადაც განაცხადა, თუმცა ჯიჯი კარიერის დასრულებას ჯერ არ აპირებს.
მიუხედავად ასაკისა, 43 წლის ლეგენდარული მეკარის მიმართ ინტერესს, როგორც ევროპული გრანდები, ასევე პატარა გუნდებიც ამჟღავნებენ. მაგალითად, ამას წინათ რამდენიმე უცხოურ გამოცემაში დაიბეჭდა, რომ ჯიჯის საკუთარ გუნდში ხილვის სურვილი „ბარსელონას“ ბოსებმა გამოთქვესო.
მოკლედ, ჭორები-ჭორებად და არ არის გამორიცხული, ვეტერანი იტაიელი მეკარე სამშობლოში დარჩეს და „მონცას“ მაისური მოირგოს. ეს მოკრძალებული იტალიური კლუბი სერია ბ-ში თამაშობს, თუმცა საკმაოდ გავლენიანი პატრონები კი ჰყავს. თავად განსაჯეთ – „მონცას“ მფლობელი სილვიო ბერლუსკონია, ხოლო გუნდის დირექტორატში ადრიანო გალიანი მუშაობს.
თავის დროზე, ადრიანო გალიანი ჯიჯის გადაბირებასთან ძალიან ახლოს იყო. 2006 წელს, ბუფონი ლამის იყო „მილანში“ გადაბარგდა, თუმცა მაშინ კონტრაქტის გაფორმებას ხელი მცირე დეტალებმა შეუშალა და ბუფონიც „იუვენტუსში“ დარჩა.
ახლა კი, გალიანის სურვილი აქვს, ძველი წადილი აისრულოს და ბუფონი თავის გუნდში მაინც მიიყვანოს. ასე რომ, ნუ გავიკვირვებთ თუ ჯიჯის მომავალ სეზონში „მონცას“ კარის დარაჯად ვიხილავთ.
