დღეს 30 დეკემბერია, რაც იმას ნიშნავს, რომ რაგბის კავშირის არჩევნები ჩატარდება. თუმცა ამის თქმა ასე გადაჭრით ნამდვილად არ შეიძლება, რადგან ბოლო (უკვე აღარც მთლად ბოლო) დროს ამ თემში სიტუაცია ძალიან არეულია და ხშირად სკანდალებიც ხდება.
რაგბის კავშირის პრეზიდენტობისთვის სამი კანდიდატი იბრძვის, ესენია: ბაჩო ხურციძე, გოჩა სვანიძე და ირაკლი აბუსერიძე.
გოჩა სვანიძე რაგბის კავშირის აწ უკვე ყოფილი პრეზიდენტია. კარგად გვახსოვს 2015 წლის არჩევნები, სადაც ერთმანეთს გია ნიჟარაძის გუნდი (რომელშიც შედიოდა გოჩა სვანიძე) და ირაკლი აბუსერიძის გუნდი დაუპირისპირდნენ, საქმე ჩხუბამდე მივიდა, რამაც საბოლოოდ არჩევნების ჩაშლა გამოიწვია. ბოლო ინფორმაციით მხარეებს შორის დაძაბულობა აღარ არსებობს და საარჩევნო სამზადისი მშვიდობიანად მიმდინარეობდა.
ბაჩო ხურციძე გიორგი ნიჟარაძის გუნდის წევრია. ბაჩო სვანიძის პრეზიდენტობის დროს რაგბის კავშირში ერთ-ერთ ყველაზე მაღალ თანამდებობაზე იყო და მას მაღალი მიღწევების მენეჯმენტი ევალებოდა. თუმცა ახლა მხარეებს შორის კარგი ურთიერთობა ნამდვილად არ არის. ცოტა ხნის წინ ხურციძემ სვანიძე ცუდ მენეჯერობაში დაადანაშაულა, 25 დეკემბერს კი, რაგბის კავშირის სხდომის ჩატარება სცადეს, რაც ორმა კანდიდატმა გააპროტესტა. ბაჩო ხურციძე ლელოს პრეზიდენტის და რაგბის სამყაროში ძალიან გავლენიანი ფიგურის, ბათუ კევლიშვილის მხარდაჭერით სარგებლობს.
ირაკლი აბუსერიძე (აბუ) საქართველოს ნაკრების ჰავბეკი (9 ნომერი) და კაპიტანი იყო. 2015 წლის არჩევნებზე კანდიდატურა მანაც წარადგინა, მაგრამ, როგორც ზომოთ ვთქვით, გია ნიჟარაძის გუნდთან დაპირისპირების ჩასახშობად მან კანდიდატურა მოხსნა.
არჩევნები ლოკომოტივის ბაზაზე ჩატარდება, 13:00 საათზე დელეგატთა რეგისტრაცია დაიწყება, ხოლო 14:00 საათიდან ყრილობა დაიწყება.
