დამ მითხრა, რომ ნაკრებში გამომიძახეს – გიორგი მიქაუტაძე

ფრანგული საფეხბურთო კლუბის, “მეცის” ოფიციალურ გვერდზე გიორგი მიქაუტაძესთან ჩაწერილი ინტერვიუ გამოქვეყნდა, სადაც ქართველმა ფეხბურთელმა რამდენიმე საინტერესო თემაზე ისაუბრა. მან ფეხბურთში პირველი ნაბიჯები გაიხსენა, ყურადღება გაამახვილა სერენში გატარებულ სეზონზე და ეროვნულ ნაკრებში ჩატარებული პირველი შეხვედრა და პირველი გოლიც შეაფასა.

“ფეხბურთში პირველი ნაბიჯები მამის დახმარებით გადავდგი. სწორედ მისი წყალობით დავიწყე ფეხბურთის ტამაში. 3-4 წლის ვიყავი და ბურთი სულ ხელში მეჭირა, სახლთან ახლოს სულ ბურთით ვთამაშობდი.

საკლუბო კარიერა გერლანდში დავიწყე, იქ ერთი წელი ვიყავი, რის შემდეგაც ლიონში გადავედი, სადაც 7 წელი გავატარე. ამის შემდეგ, სენტ პრისტში აღმოვჩნდი, ეს კლუბი ლიონთან ახლოს მდებარეობს. მეცში გადმოსვლის შემდეგ, იჯარით სერენში წავედი და ახლა ისევ აქ დავბრუნდი.

მეცში ჩამოსვლა ცოტა რთული იყო, რადგანაც ოჯახის დიდი ხნით დატოვება არ მჩვევია. ცხადია, ადაპტაცია რთულია. ამ ამბავს ნელ-ნელა ვეჩვევი. ახლა ყველაფერი კარგადაა.

პირველი პროფესიონალური შეხვედრაც მახსოვს, ნამდვილად მაგარი შეგრძნება იყო. დიდი სიამოვნება და სიხარული იყო მეცის მაისურის ტარება. პროფესიონალურ ფეხბურთში მოხვედრა ბავშვობის ოცნების ახდენა იყო. ეს დიდი ბედნიერებაა, რადგანაც პატარაობიდანვე ამისთვის ვმუშაობდი. იმედი მაქვს, რომ ეს გზა დიდხანს გაგრძელდება.

სერენში კარგი სეზონი მქონდა, როგორც ინდივიდუალურად, ასევე გუნდთან ერთად. იქ ჩავედი და ყველამ თბილად მიმიღო და კარგად დამხვდნენ. წარმოუდგენელი სეზონი ჩავატარეთ და უმაღლეს დივიზონში გადავედით.

საქართველოს ნაკრებში გამოძახების შესახებ არაფერი ვიცოდი. ეს ყველაფერი ჩემმა დამ მითხრა. რამდენიმე დღით ადრე მწვრთნელს ვილი სანიოლს ვესაუბრე და რაღაცები განვიხილეთ. ჩემმა დამ გამაგებინა, რომ ნაკრებში გამომიძახეს. ეს უდიდესი ბედნიერება იყო, ამაყი ვიყავი მეც და ჩემი ოჯახიც.

ჩემი პირველი გოლი ეროვნულ ნაკრებში საკმაოდ ემოციური იყო. ამხანაგურ შეხვედრაში რუმინეთთან გოლი გავიტანე მეორე ტაიმში. ორივე ფეხბურთელი საჯარიმოში შევედით. ჩემმა თანაგუნდელმა დაცვას აჯობა და მე მის უკან დავრჩი, რადგანაც ვიგრძენი, რომ ის ბურთს მიტოვებდა. ბურთი კარგად გავაკონტროლე და ყველაფერი მაგრად დასრულდა. ეს ყველაფერი ბედნიერებაა და უამრავი ემოცია მივიღე. ამავე დროს არ ვიცი, როგორ ავხსნა ეს გრძნობა. როგორც ვთქვი, ეს იყო ის, რაზეც ბავშვობიდან ვოცნებობდი”.

გიორგი მიქაუტაძეს ბელგიაში ბრწყინვალე სეზონი ჰქონდა. ის კლუბისა და ლიგის ბომბარდირი გახდა. მისი გუნდი ბელგიის უმაღლეს ლიგაში აღზევდა, ხოლო მიქაუტაძე მეცის რიგებში დააბრუნეს, რათა მან კლუბის ღირსება ლიგა ერთში დაიცვას.