სათქმელიც ბევრი არაფერია. ნიკოლოზ ბასილაშვილი თავის საყვარელ ჰამბურგის ტურნირს ნაადრევად დაემშვიდობა. მკითხველმა შეიძლება იფიქროს რაღა ნაადრევად, 8 საუკეთესოში გავიდა და 1/4 ფინალში წააგოო, თუმცა ამან შეცდომაში არ შეგიყვანოთ. ქართველი ჩოგბურთელი ამ ეტაპამდე უთამაშებლად მივიდა, რამაც ნებსით თუ უნებლიედ დათვური სამსახურიც გაუწია.
ნიკოლოზ ბასილაშვილი ჰამბურგში მესამე ნომრად იყო განთესილი და შეაბამისად ტურნირშიც მეორე წრიდან უნდა ჩართულიყო, თუმცა არგენტინელ მეტოქეს კოვიდ 19 დაუდასტურდა და გათამაშებიდანაც მოიხსნა. აქედან გამომდინარე, ქართველი მეჩოგნე მეოთხედფინალში უბრძოლველად აღმოჩნდა, რაც ერთი მხრივ თითქოს სასიამოვნო კი იყო, მაგრამ აშკარად გამოჩნდა რომ სათამაშო ტონუსიდან ამოვარდნილი ჩანდა.
ალბათ შეხსენება საჭირო არ უნდა იყოს, რომ ნიკოლოზ ბასილაშვილს ჰამბურგის პრესტიჟული 500-იანი კატეგორიის ტურნირი ზედიზედ ორჯერ – 2018 და 2019 წლებში აქვს მოგებული, შარშან კი სასტარტო ეტაპზევე ესპანელ რობერტო ბაუტისტა აგუტთან დამარცდა.
ნახევარფინალში გასასვლელად ნიკოლოზ ბასილაშვილს ლასლო ჯერეს ბარიერი უნდა გადაელახა, თუმცა ამის გაკეთება ვერ მოახერხა. სერბი მეჩოგნე მოწოდების სიმაღლეზე იყო და ბასილაშვილსაც შანსი არ დაუტოვა. თამაში ვის არ წაუგია, მაგრამ გულდასაწყვეტი ის იყო, რომ ბასილაშვილმა თავისი შესაძლებლობების ალბათ ნახევარიც ვერ გამოავლინა და ლასლო ჯერესაც ამით საქმე ერთი-ორად გაუმარტივა. 7 ორმაგ შეცდომას ნიკოლოზ ბასილაშვილმა უამრავი უნებლიეც მიაყოლა და საბოლოოდ ორ სეტში, ერთნაირი ანგარიშით – 2:6, 2:6 დამარცხდა.
ნიკოლოზ ბასილაშვილი ჰამბურგიდან იაპონიაში გაემგზავრება, სადაც 24 ივლისიდან ტოკიოს ზაფხულის ოლიმპიურ თამაშებში ჩაერთვება.
