საქართველოს ჩოგბურთის ფედერაცია სპეციალური განცხადებით გამოეხმაურა ოქსანა კალაშნიკოვას საკითხს. ფედერაციაში იმედი გამოთქვეს, რომ თემას ნათელს საქართველოს ეროვნული ოლიმპიური კომიტეტი მოჰფენს, რომელსაც ტოკიოს ოლიმპიური თამაშების ლიცენზიანტებისთვის ყველაზე საჭირო დოკუმენტაციის წარდგენა ევალებოდა.
“საქართველოს ჩოგბურთის ფედერაცია ეხმაურება ქართველი ჩოგბურთელის ოქსანა კალაშნიკოვას განცხადებას ტოკიოს ოლიმპიადაზე წყვილთა თანრიგში მის მონაწილეობასთან დაკავშირებული გაუგებრობის შესახებ და აღნიშნავს, რომ საქართველოს ჩოგბურთის ფედერაციამ საერთაშორისო ოლიმპიური კომიტეტისგან მიიღო ნიკოლოზ ბასილაშვილისთვის ლიცენზია ერთეულთა თანრიგში. მიუხედავად მიღებული ერთი ლიცენზიისა, საქართველოს ჩოგბურთის ფედერაციამ საქართველოს ოლიმპიურ კომიტეტს დათქმულ ვადაში მიაწოდა ოლიმპიური ლიცენზიანტების გაფართოებული სია, რის შემდეგაც საქართველოს ოლიმპიურმა კომიტეტმა, ნიკოლოზ ბასილაშვილის განაცხადთან ერთად, საერთაშორისო ოლიმპიურ კომიტეტს წარუდგინა პოტენციური ოლიმპიელების კანდიდატურები.
საქართველოს ოლიმპიური კომიტეტი დაკომპლექტებულია პროფესიონალებით, რომლებიც მრავალი წელია აღნიშნულ საქმეს ემსახურებიან და კარგად ასრულებენ დაკისრებულ მოვალეობას. აქედან გამომდინარე, საქართველოს ჩოგბურთის ფედერაცია იმედს იტოვებს, რომ ეროვნულმა ოლიმპიურმა კომიტეტმა პირნათლად შეასრულა დაკისრებული მოვალეობა, ყველა წესის დაცვით წარუდგინა შესაბამისი დოკუმენტაცია საერთაშორისო ოლიმპიურ კომიტეტს. ვიმედოვნებთ, რომ საქართველოს ეროვნული ოლიმპიური კომიტეტი უმოკლეს დროში დაადგენს და ყველა დაინტერესებულ მხარეს აცნობებს, რა მიზეზით ვერ მიიღეს ქართველმა ჩოგბურთელებმა წყვილთა თანრიგში ოლიმპიური ლიცენზიები და რა კრიტერიუმებით მოხვდნენ ტოკიოს ოლიმპიადაზე რეიტინგით ქართველებზე უკან მდგომი ნაკრები გუნდები”.
შეგახსენებთ, რომ ქართველმა ჩოგბურთელმა სკანდალური პოსტი სოციალურ ქსელში გუშინ განათავსა. როგორც ოქსანა კალაშნიკოვა წერდა, მას მოახლოებულ ოლიმპიადაზე თამაში შეეძლო, თუმცა, იმის გამო, შესაბამის ორგანოებში განაცხადი არ იქნა გაგზავნილი, ეს უფლება ჩამოერთვა. მას გუშინვე უპასუხა საქართველოს ეროვნული ოლიმპიური კომიტეტის სპორტულმა დირექტორმა გიორგი ესაკიამ.
