ოლიმპიურმა ჩემპიონმა და მსოფლიოში ყველაზე ძლიერმა მამაკაცმა, ლაშა ტალახაძემ პირველი არხის ეთერში საქართველოს მოსახლეობას დამოუკიდებლობის დღე მიულოცა.
26 წლის სპორტსმენმა პატივი ომში დაღუპული გმირების ხსოვნასაც მიაგო.
„ჩემი დიდი პატივისცემა გმირებს, ვისი წყალობითაც ჩვენს მიწა-წყალზე ვდგავართ, თავისუფლები და დამოუკიდებლები ვართ. დღესაც ყოველდღიურად გვიწევს ბრძოლა თავისუფლების შენარჩუნებისთვის“, – განაცხადა ლაშამ გადაცემა „ტაიმაუტში“ სტუმრობისას.
ტალახაძემ იმ ემოციებზე ისაუბრა, რომელიც მან 2016 წელს ოლიმპიური ჩემპიონობისას განიცადა. ქართველმა ძალოსანმა მოახლოებულ ტოკიოს ოლიმპიადაზეც ისაუბრა და განაცხადა, რომ ჩემპიონობისთვის ყველაფერს გააკეთებს.
„როდესაც ოლიმპიურ თამაშებზე საქართველოს სახელით გამოდიხარ, ემოცია მოზღვავებულია, თითოეულ სპორტსმენს გაუჭირდება იმის გადმოცემა, რას ვგრძნობთ.
2016 წელს, ჩემპიონობა რომ მოვიპოვე, იმ მომენტში ვერ გავაცნობიერე, რას მივაღწიე. ოლიმპიური ჩემპიონობა ხომ სპორტსმენებისთვის ყველაზე დიდი ტიტულია. მიზნის მიღწევა ჩემი გუნდისა და მწვრთნელის, გიორგი ასანიძის დახმარებით შევძელი.
როდესაც საქმე ეხება საქართველოს დროშას, როდესაც ვიცით, რომ ჩვენს უკან ქართველი ხალხია, სხვა მობილიზებით გავდივართ. ეს გვაძლიერებს, დამატებით ენერგიას გვაძლევს ვარჯიშისთვისაც და შეჯიბრებებისთვისაც.
ახლა ტოკიოს ოლიმპიადისთვის ვემზადებით, გვინდა მაქსიმალურად მომზადებულები შევხვდეთ და საქართველოში გამარჯვებით დავბრუნდეთ“, – აღნიშნა ძალოსანმა.
