როგორც იცით, ვალიადოლიდის წინააღმდეგ ლა ლიგის მე-15 ტურის მატჩში, ლეო მესიმ ბარსელონას მაისურით 644-ე გოლი გაიტანა და ბრაზილიელი პელეს რეკორდი მოხსნა, რომელსაც თავის მხრივ, სანტოსის შემადგენლობაში მეტოქეთა კარი 643-ჯერ ჰქონდა აღებული.
ლეოს რეკორდის აღსანიშნავად, ლუდის მწარმოებელმა კომპანია „ბუდვაიზერმა“ სპეციალური შეფუთვით 644 ბოთლი გამოუშვა და იმ მეკარეებს გაუგზავნა, რომელთა კარშიც არგენტინელს გოლი ან გოლები გაუტანია. ასეთი კი სულ 160 გოლკიპერია.
მესიმ ბარსელონას რიგებში 451 გოლი ლა ლიგაში გაიტანა, ჩემპიონთა ლიგაზე – 118, ესპანეთის სამეფო თასზე – 53. ხოლო, სხვადასხვა ტურნირებზე, როგორიცაა ესპანეთის სუპერთასი, ევროპის სუპერთასი და მსოფლიოს საკლუბო ჩემპიონატი, მას ჯამში 22 გოლი აქვს გატანილი.
აღსანიშნავია, რომ ყველაზე მეტი ბოთლი ვალენსიას ყოფილ გოლკიპერს დიეგო ალვეშს ერგება, რომლისთვისაც მესის 21 გოლი აქვს გატანილი, თუმცა ყველაზე მეტი თერთმეტმეტრიანიც სწორედ მან აუღო.
საჩუქარი ტურინის იუვენტუსის მეკარემ ჯანლუიჯი ბუფონმაც მიიღო, რომელიც ამ ფაქტს სოციალურ ქსელში გამოეხმაურა.
.@budfootball… thanks for the beers.🍻 I’ll take it as a compliment. 😉 We have great battles over the years! Congratulations on breaking the 644 record #Messi! it really is an unbelievable achievement. Cheers! #BeAKing #ad pic.twitter.com/Rvz2kSv23B
— Gianluigi Buffon (@gianluigibuffon) December 24, 2020
“მადლობა ლუდისთვის. ამას, როგორც კომპლიმენტს, ისე მივიღებ. მრავალი წლის მანძილზე ჩვენ ბევრი დაპირისპირება გვქონია. ვულოცავ მესის ამ რეკორდის მოხსნას. ეს მართლაც დაუჯერებელი მიღწევაა”, – დაწერა ჯიჯიმ.
