რუსეთის ნაკრების მორაგბეები ხმამაღალი განცხადებების გაკეთებას არც შეხვედრის დასრულების შემდეგ ერიდებიან.
რუსის დათვების ერთ-ერთი მორაგბე, ვალერი მოროზოვი, რომელიც ინგლისური სეილ შარკსის ღირსებას იცავს საქართველო-რუსეთის მატჩს ეხმაურება.
26 წლის მორაგბე ფიქრობს, რომ მისმა ნაკრებმა საქართველოსთან თავი კარგად წარმოაჩინა და რუსებს ბორჯღალოსნებისთვის უნდა მოეგოთ. თავად მოროზოვს მატჩში მონაწილეობა არ მიუღია.
„თამაშის წინ ძალიან გვაღელვებდა სტატისტიკა, მაგრამ ბიჭებმა ამოცანას თავი ღირსეულად გაართვეს. ერთ ეპიზოდში მათ ქართველებს დიდი ბრძოლაც გაუმართეს, მეტოქის 5-მეტრიან ზონაში შერკინებაც მოიგეს და ლელო დადეს. მატჩი ძალიან მომეწონა. ბიჭებმა თავი შესანიშნავად წარმოაჩინეს და ბოლომდე იბრძოდნენ. შეიძლება ითქვას, რომ ბოლო 1 წელში ძალიან ცოტა მატჩი ჩავატარეთ და ეს მხოლოდ მეორე თამაში იყო. ამ პერიოდში, რუსულ კლუბებს დასვენება უწევთ და საერთაშორისო დონეზე ესეც პრობლემაა. კარგ ფორმაში რომ ვიყოთ, გუნდმა ბევრი შეხვედრა უნდა ჩაატაროს. დეკემბერში ბიჭებმა მხოლოდ ადგილობრივი კლუბების წინააღმდეგ ითამაშეს, მაგრამ ერთი მატჩი მნიშვნელოვან სხვაობას ვერ მოგვცემს. ამ ყველაფრის მიუხედავად, გუნდმა საქართველოს წინააღმდეგ მაქსიმუმი გააკეთა. დიახ, საქართველომ ლელო მხოლოდ და მხოლოდ 9 ნომრის ინდივიდუალური ოსტატობის ხარჯზე დადო. საერთო ჯამში კი ქართველებს განსაკუთრებული არაფერი გაუკეთებიათ, მხოლოდ მოლებს გვიყენებდნენ. რუსეთის ნაკრებმა საკმაოდ კარგად ითამაშა და ასეთი საქართველოსთვის უნდა მოგვეგო“, – ამბობს მოროზოვი Rugby.ru-სთან ინტერვიუში.
შეგახსენებთ, რომ 7 თებერვალს, საქართველოს მორაგბეთა ნაკრებმა რუსეთი 16:7 დაამარცხა და ისტორიის განმავლობაში ზედიზედ მე-19 გამარჯვება მოიპოვა. საერთო ჯამში, რუსებსა და ქართველებს ერთმანეთის წინააღმდეგ 22 შეხვედრა აქვთ გამართული და ჩვენმა მოწინააღმდეგემ მხოლოდ პირველ მატჩში გაიმარჯვა.
