ასე მითხრეს დაბერდიო – ლუის სუარესი ბარსელონაზე ნაწყენია

გუნდისთვის მაქსიმუმს გაიღებ, ფიქრობ რომ იქ ყველას უყვარხარ და გაღმერთებენ, უცებ კი საკმაოდ არაეთიკური ფორმით გითითებენ, რომ მათ აღარ სჭირდები.

დიახ, ხანდახან ასეთია ფეხბურთელის ხვედრი. არაერთი შემთხვევა გვახსენდება, როდესაც ამა თუ იმ ვარსკვლავს საყვარელ გუნდს თვალზე ცრემლომდგარი დაუტოვებია. კონკრეტული მაგალითების ჩამოთვლა ნამდვილად შორს წაგვიყვანს.

ლუის სუარესი „ბარსელონაში“ 6 წლის მანძილზე თამაშობდა და გუნდისთვის თითქოს შეუცვლელი ფიგურა გახლდათ, მაგრამ კაცი ბჭობდა ღმერთი იცინოდაო. ურუგვაელ ფორვარდს, კატალონიური გრანდის ბოსებმა უცერემონიოდ გამოუცხადეს, რომ მისი სამსახური აღარ სჭირდებოდათ.

ლუის სუარესი პოპულარულ France Football-თან ინტერვიუში სწორედ ბარსელონაში გატარებულ პერიოდს და გუნდიდან მის გაშვებას იხსენებს.

„ბარსელონა ჩემთვის სულერთი არ იყო. იქ არაჩვეულებრივი წლები გავატარე და ქალაქიც ძალიან შემიყვარდა. მეორეს მხრივ კი ბედნიერი ვეღარ ვიქნებოდი იმ გუნდში, სადაც შენი აღარ სწამთ და გენდობიან.

იქაურობის დატოვება გაგვიჭირდა. პირველ რიგში ეს ოჯახზე და ბავშვებზე ითქმის. ბარსელონა ლამაზი ქალაქია და მას კარგად შევეგუეთ. შვილებმაც მეგობრები გაიჩინეს. ამიტომ, ყველაზე მეტად კატალონიის დატოვებამ მათზე იმოქმედა, რადგან იქ მეგობრებთან განშორება მოუხდათ.

ბარსელონას ხელმძღვანელობისგან ასეთ მოპყრობას არ ველოდი. ვფიქრობ, არც ვიმსახურებდი. მათ პირდაპირ გამომიცხადეს, რომ ასაკში ვარ და გუნდისთვის გამოსადეგი ვეღარ ვიქნებოდი. რა თქმა უნდა, ყველაფერ იმის შემდეგ, რაც ბარსელონაში გამოვიარე, ასეთი დამოკიდებულება მეწყინა.

მაინც ვერ ვიგებ ასე რატომ მომექცნენ. 6 წლის მანძილზე არაერთი გოლი გავიტანე და გუნდთან ერთად ტიტულები მოვიგე. სეზონში მინიმუმ 20 გოლი მაინც გამქონდა. ამიტომ, ცოტა არ იყოს გამიკვირდა მათგან ასეთი ქცევა“ – ამბობს 34 წლის ურუგვაელი ფორვარდი.

მადრიდის „ატლეტიკოში“ გადაბარგების შემდეგ, ლუის სუარესმა მიმდინარე სეზონში უკვე 16 გოლის გატანა მოასწრო.