ქართველი გულშემატკივარი დიდი მატჩის მოლოდინშია. საქართველოს ნაკრები მსოფლიო ჩემპიონატის შესარჩევი ეტაპის მეორე ტურში თბილისში ესპანეთის ნაკრებს დაუპირისპირდება.
არჩილ არველაძის აზრი ფეხბურთის გულშემატკივრებისთვის ყოველთვის საინტერესო იყო, არის და იქნება. საქართველოს ნაკრების ყოფილი ფორვარდი გადაცემა „სპორტი იმედზე“ სტუმარი იყო, სადაც მან თავდაპირველად 25 მარტს შვედეთთან დაპირისპირება შეაფასა.
„პირველ რიგში მინდა დებიუტანტებს მივულოცო ეროვნულ ნაკრებში გამოძახება. მათ თავი კარგად წარმოაჩინეს და აუგს ნამდვილად ვერ ვიტყვით.
ასევე აუცილებლად უნდა გამოვყო გიორგი ქვილითაიას და გიორგი ლორიას კარგი თამაში. დიახ, ბევრი აკრიტიკებს ქვილითაიას, მაგრამ ეს არასწორია. იმ გაფუჭებულ მომენტამდე 60 მეტრი ირბინა და ეს ცოტას არ ნიშნავს. თან ის დრიბლინგის ფეხბურთელი არ არის. სამწუხაროა, რომ ვერ შეაგდო.
გიორგი ქვილითაიამ მთელი მატჩის მანძილზე არაერთი შავი სამუშაო შეასრულა. გამუდმებით 2-3 მცველის წინააღმდეგ უხდებოდა ბრძოლა და თითქმის ყველა პირველი ბურთი მიიღო.
გიორგი ლორია კი ყოველთვის სტაბილურად თამაშობს და ეს ძალიან მნიშვნელოვანია ჩვენი ნაკრებისთვის. შვედებთანაც რამდენიმე რთული ბურთი აიღო.
ცუდია, რომ მეორე ტაიმში ხვიჩა კვარაცხელია გამოგვაკლდა. სიმართე ითქვას ცოტა უფრო მეტს მოველოდი შვედებისგან. ჩვენმა ნაკრებმა თამამად და რისკიანად ითამაშა. მე არ მახსენდება იშვიათი გამონაკლისის გარდა, რომ ლორიას ბურთი უმისამართოდ მოეგერიებინა“ – აღნიშნა არჩილ არველაძემ.
