25 მარტს, სტოქჰოლმში, საქართველოს ნაკრების მთავარი მწვრთნელის რანგში ვილი სანიოლის დებიუტი შედგა. დამოუკიდებლობის მანძილზე ჯვაროსნებს არაერთი თავკაცი გამოუცვლია. ვნახოთ ამჯერად როგორი იქნება ფრანგი სპეციალისტის მოღვაწეობა.
საქართველოს ნაკრების ყოფილი ფეხბურთელი არჩილ არველაძე, გადაცემაში „სპორტი იმედზე“ მიუხედავად მარცხისა, ვილი სანიოლის დებიუტს ცუდად არ აფასებს და თამამ გადაწყვეტილებებს უწონებს.
„ვილი სანიოლის დებიუტს დამაკმაყოფილებლად შევაფასებდი. ცუდი როგორ უნდა ვთქვა? ვულოცავ მას ეროვნულ ნაკრებში მუშაობის ოფიციალურად დაწყებას. შვედებთან შესაძლებელი იყო ქულის აღებაც. ორი მაგარი მომენტი გვქონდა.
გაცილებით რთულ თამაშს და შვედებისგან მეტ აქტიურობას ველოდი. სტატისტიკური მონაცემებითაც ჩანს, რომ მეტოქეს დიდად არ დავუჩაგრივართ.
სანიოლიმ თამამი გადაწყვეტილებები მიიღო, თუნდაც შეცვლების დროს. ის, რომ ეროვნული ლიგის ფეხბურთელებს მისცა შანსი ცალკე აღნიშვნის ღირსია.
რაც შეეხება მომავალ მატჩს. ყველა უნდა შევეგუოთ, რომ ესპანეთის დონის ნაკრების წინააღმდეგ თამაში ძირითადად ნიშნავს უბურთოდ ყოფნას. იმედი მაქვს ბიჭები ბოლომდე დაიხარჯებიან და მოედანზე მაქსიმუმს გაიღებენ“ – ამბობს არჩილ არველაძე.
