ანდრეი შევჩენკოს ფეხბურთის ქომაგთათვის წარდგენა ნამდვილად არ უნდა სჭირდებოდეს. ახლო წარსულში, გამორჩეული უკრაინელი ფორვარდი „მილანის“ ერთ-ერთი საკვანძო ფიგურა და მთავარი დამრტყმელი ძალა გახლდათ.
შევჩენკომ საფეხბურთო კარიერა დიდი ხნის წინ დაასრულა და 2016 წლიდან საკუთარი ქვეყნის ეროვნულ ნაკრებს თავკაცობს. მან უკრაინის ნაკრები ევროპის ჩემპიონატზე გაიყვანა და ამ დიდ ფორუმზე წარმატების მიღწვასაც შეეცდება.
ანდრეი შევჩენკო იტალიურ მედიასთან კომენტარში თავის ოცნებას ამხელს, რომელიც გასაკვირი არ უნდა იყოს, რომ „მილანს“ უკავშირდება.
„ეს გუნდი ჩემთვის მშობლიურივით არის. მილანის წარმატება ყოველთვის გამიხარდება. ვიმედოვნებ, რომ როსონერი ჩემპიონთა ლიგის საგზურს მოიპოვებს.
მილანის მთავარი მწვრთნელობა? ეს ფანტასტიკური იქნებოდა და ჩემი ოცნებაა“ – ამბობს ანდრეი შევჩენკო.
