იტალიის ჩემპიონატის მორიგ ტურში, „იუვენტუსმა“ მნიშვნელოვანი 3 ქულა მოიპოვა. ტურინელებმა პრინციპულ მეტოქეს „რომას“ შინაურ კედლებში 2:0 აჯობეს. „ბებერი ქალბატონის“ და „ჯოლოროსის“ დაპირისპირებები სერია ა-ში ყოველთვის დიდ ინტერესს იწვევს.
ამ მოგებით „იუვენტუსმა“ 42 ქულა დააგროვა და სატურნირო ცხრილშიც მესამე ადგილზე აინაცვლა. მატჩის შემდეგ კმაყოფილი ჩანდა ტურინელთა დამრიგებელი ანდრეას პირლოც.
„რომა კარგი გუნდია და ამიტომაც სერიოზული დაპირისპირების მოლოდინში ვიყავით. ვიცოდით, რომ უკანმოუხედავად არ უნდა შეგვეტია, რადგან მეტოქე კონტრშეტევებზე იდეალურად თამაშობს. ფრთხილი ტაქტიკა ავირჩიეთ. თავს კარგად ვიცავდით და შეტევებზეც უარს არ ვამბობდით.
ბიჭებს მოედანზე დიდ ენთუზიაზმს ვატყობდი, რაც გამარჯვებაში დაგვეხმარა. ყველა თამაში ერთნაირი არ არის. პირველი რაც იუვენტუსის მწვრთნელის რანგში ვისწავლე სწორედ ეს არის. ყოველთვის უნდა გქონდეს სათადარიგო გეგმა, თორემ მარტივად გაიშიფრები.
აქტივში მნიშვნელოვანი 3 ქულა ჩავიწერეთ და ეს მახარებს, თუმცა წინ კიდევ არაერთი მატჩი გველის. იუვნტუსის მიზანი როგორც ყოველთვის ჩემპიონობა იქნება“ – ამბობს ანდრეა პირლო.
