იტალიის ნაკრები ევროპის ჩემპიონატის საუკეთესო 8 გუნდშია. „სკუადრა აძურამ“ ჯგუფურ ეტაპზე შთამბეჭდავი გამარჯვებების შემდეგ, პლეიოფში ქომაგები ძალზედ ანერვიულა და ავსტრიის ბარიერის გადალახვა მეტად გაუჭირდა.
რობერტო მანჩინის შეგირდებმა მეტოქის გატეხვა მხოლოდ დამატებით დროში შეძლეს და 2:1 იმარჯვეს, თუმცა კაცმა არ იცის მეორე ტაიმის შუაწელს ავტრიელთათვის გატანილი გოლი რომ ჩაეთვალათ, რომელიც 2 სანტიმეტრიანი ოფსაიდის გამო გაუქმდა მოვლენები როგორ განვითარდებოდა.
ახლო წარსულში ერთ-ერთი გამორჩეული ფეხბურთელი და იტალიის ნაკრების ფორვარდი ალესანდრო დელ პიერო თავისი თანამემამულეების გამარჯვებით გახარებული კი არის, თუმცა თამაშის ხარისხით დიდად მოხიბლული ვერ დარჩა.
„რა თქმა უნდა, ძალზედ ბედნიერი ვარ, რომ გავიმარჯვეთ და 1/4 ფინალში ვართ, თუმცა ნერვიულობისგან რამდენიმე კილოგრამი დავიკელით. იტალიის ნაკრებისგან უკეთეს თამაშს ველოდი, ისეთივეს როგორც ჯგუფურ ეტაპზე აჩვენეს, მაგრამ ავსტრიელებმაც ბრძოლისუნარიანობით და მედგარი წინააღმდეგობით გაგვაოცეს.
ცხადია, გაგვიმართლა როდესაც მეტოქეს გოლი არ ჩაუთვალეს, რამაც იტალიელ ფეხბურთელებზე დადებითად იმოქმედა და გამოაფხიზლა. ავსტრიასთან დაპირისპირებისგან დასკვნები უნდა გამოვიტანოთ და მომდევნო მატჩს სრულ მზადყოფნაში და მაქსიმალურად კონცენტრირებულნი შევხვდეთ“ – აღნიშნა ალესანდრო დელ პიერომ.
