მსოფლიო ჩემპიონატის შესარჩევი ეტაპის საგაზახფულო სესია დასრულებულია. ევროპის სტადიონებზე არაერთი საინტერესო და დაძაბული მატჩები გაიმართა, რომელთაგან რამდენიმე მოულოდნელი შედეგითაც დასრულდა.
საქართველოს ნაკრებმა 3 მატჩი გამართა და ჯერჯერობით აქტივში ოდენ ერთი ქულა აქვს, თუმცა მეტი სამართლიანობისთვის ისიც უნდა ითქვას, რომ ჯვაროსნები მეტს იმსახურებდნენ.
სალონიკში, საბერძნეთის წინააღმდეგ ნათამაშები ფრე მართლაც რომ დასანანი იყო. საქართველოს ნაკრებს არაერთი მომენტი ჰქონდა და გამარჯვებაც შეეძლო.
იგივეს აღნიშნავს ბერძნული მედიაც. მაგალითად, სააგენტო , ekathimerini.com წერს, რომ საბერძნეთის ნაკრები მეტოქეს ბევრ კომპონენტში ჩამოუვარდებოდა.
„ჩვენი გუნდი ამ მატჩს ფავორიტის სტატუსით შეხვდა, თუმცა იმედები ვერ გაამართლა და კინაღამ წააგო. საბერძნეთი საქართველოს თითქმის ყველა კომპონენტში ჩამოუვარდებოდა და ვფიქრობთ ფრითაც კმაყოფილი უნდა დარჩენილიყო. საწყისი 20 წუთის შემდეგ არანაირი გეგმა არ არსებობდა და მოედანზე ქაოტურად მოქმედებდნენ. მასპინძლებს, შეტევაშიც და დაცვაშიც უჭირდათ“ .
კიდევ ერთი ბერძნულ გამოცემას greekcitytimes.com კი სათაურად შემდეგი სიტყვები გამოაქვს – „„საბერძნეთის ნაკრებს გაუმართლა საქართველოსთან საშინაო კედლებში გამართულ მატჩში წაგებას რომ გადაურჩა.“
„მეორე ტაიმში, რომ არა საბერძნეთის ნაკრების მეკარის ყოჩაღობა ჩვენი ნაკრები აუცილებლად წააგებდა. ამიტომაც, ამ ფრით უკმაყოფილო არ უნდა ვიყოთ“ – ნათქვამია აღნიშნული გამოცემის სტატიაში.
„საბერძნეთის ნაკრებმა საქართველოს წინააღმდეგ ცუდად ითამაშა და მეტოქის მიერ გაკეთებული საჩუქარი ვერ გამოიყენა. მატჩი ფრედ, 1-1 დასრულდა და მასპინძლებმა კარგად მხოლოდ შეხვედრის 15 წუთი ჩაატარეს. სანიოლის გუნდმა მეტოქეზე ზეწოლა განახორციელა და თავისი ფეხბურთი არ ათამაშა” – ასე გამოეხმაურა მატჩს კიდევ ერთი გამოცემა onsports.gr
სააგენტო novasports.gr კი წერს – „გაგვიმართლა და ავტოგოლით დავწინაურდით, მაგრამ კვარაცხელიამ დიდებული გოლი გაგვიტანა. საბერძნეთის ნაკრებში საუკეთესო მეკარე იყო, რომელმაც რამდენჯერმე აშკარა გოლისგან გვიხსნა“.
საქართველოს ნაკრებს ზაფხულში ორი ამხანაგური მატჩი ელის. რუმინეთის სახით ერთი მეტოქე უკვე ცნობილია, მეორე კი მოგვიანებით გაირკვევა.
მსოფლიო ჩემპიონატის შესარჩევი ეტაპი სექტემბრიდან განახლდება.
