ეროვნული ლიგის მეხუთე ტური, რომელშიც ჯამში 14 გოლი გავიდა გორის „დილას“ და ქუთაისის „ტორპედოს“ მატჩით დასრულდა.
თენგიზ ბურჯანაძის სახელობის სტადიონზე ქუთათურები ბოლომდე მედგრად დადგნენ და შინ ქულით ბრუნდებიან. წყვილის ფავორიტად გორელები ითვლებოდნენ და სამართლიანადაც. „ტორპედოს“ ახლა არცთუ ისე კარგი პერიოდი უდგას და რამდენიმე წლის წინანდელი გუნდისგან, რომელიც საქართველოს ჩემპიონი დამსახურებულად ხდებოდა საგრძნობი სხვაობაა.
ძველი დიდება და ტკბილი მოგონებები იქით იყოს და ის, რომ ეს „ტორპედო“ მაშინდელი გუნდის აჩრდილია იმას არ ნიშნავს ყველა მატჩს წააგებენ ან ვინმეს თავსატეხს არ გაუჩენენ.
ასე მოხდა ამჯერადაც. გორიდან წაღებული ქულა წესით და რიგით ქუთაისელებისთვის ურიგო შედეგი არ უნდა იყოს.
სამართლიანობა მოითხოვს აღინიშნოს, რომ მასპინძლები დიდ უპირატესობას ფლობდნენ, განსაკუთრებით მეორე ტაიმში, მაგრამ მოგება მაინც ვერ მოახერხეს. „ტორპედომ“ ერთადერთი შანსი გამოიყენა, როდესაც გუნდის ბელარუსმა ლეგიონერმა დიმიტრი რეკიშმა საჯარიმოს ხაზიდან დარტყმით ანგარიში გახსნა. „დილამ“ მალევე გაათანაბრა. საჯარიმოში ხელით თამაშის გამო „ტორპედოს“ კარში პენალტი დაინიშნა, რომელიც გოლად გორელთა ბრაზილიელმა ფეხბურთელმა ვანდერსონმა აქცია – 1:1.
ფრის მიუხედავად, გორის „დილამ“ სატურნირო ცხრილში 11 ქულით პირველობა მაინც შეინარჩუნა. მომდევნო მატჩს „დილა“ 3 აპრილს თბილისის „დინამოსთან“ სტუმრად გამართავს, „ტორპედო“ კი შინ ქობულეთის „შუქურასთან“.
