ქართველმა ბორჯღალოსნებმა რაგბი ევროპის გათამაშების სასტარტო 3 მატჩი და თანაც ყველა სტუმრად მოიგეს და ამით გათამაშების კიდევ ერთხელ წარმატებით დასასრულებლად დიდი ნაბიჯი გადადგეს.
წინ 28 მარტს, თბილისში რუმინეთთან ჯახია და იმედია ქართველი მორაგბეები არც ამ მატჩში შეირცხვენენ თავს.
რუსეთთან, ქალაქ კალინინგრადში ლაღად და ლამაზ სტილში მოგებულმა თამაშმა ქართველი გულშემატკივარი კიდევ ერთხელ გაახარა.
გადაცემა „სპორტი იმედზე“, ბორჯღალოსანთა მთავარმა მწვრთნელმა ლევან მაისაშვილმა საინტერესო თემებზე ისაუბრა.
„ძალიან ცუდი ფონი გვქონდა. სტრესულ მდგომარეობაში ვიყავით. ჩვენ დავკარგეთ მორაგბე გიორგი ლომთაძე და ეს ნერვიულობა თამაშის წინ იყო. ერთმანეთს ვერ ვუზიარებდით ამ ტკივილს. მინდა მის ოჯახს მივუსამძიმრო. ჩვენთვის ძალიან ძვირფასი ადამიანი იყო.
რაც ქართულ რაგბში ხდებოდა იყო ძალიან ცუდი და ეს მოქმედებდა ჩვენზეც. თამაშებს როდესაც ვიგებთ და მოდის ამხელა ნეგატივი ეს გაუგებარია ჩემთვის. მე არ ვაქცევ ამას ყურადღებას, მაგრამ ეს ბიჭებზე და მათ განწყობაზეც მოქმედებს და ამას ვაქცევ ყურადღებას.
კრიტიკა მისაღებია და ეს ჩვეულებრივი ამბავია, მაგრამ ჯანსაღი. მოგებული თამაშის შემდეგ ასეთი ნეგატივის ნიაღვარი გაუგებარი იყო.
ახალ პრეზიდენტს ბატონ სოსო ტყემალაძეს მივულოცავ და ვუსურვებ ქართული რაგბი იმ რელსებზე დააყენოს, რაც ყველას გვინდა.
ჩვენ ნაკრებს მეტი თამაში სჭირდება, ოღონდ ძლიერ გუნდთან დაპირსპირებები. სწორედ ასეთი მატჩები გზრდის და იღებ გამოცდილებას. ჩვენ გყვავს ახალგაზრდა ბიჭები, რომლებიც ახლა იდგამენ ფეხს. ამჟამად, ნაკრებში მეორე ხაზი აბსოლუტურად გაახალგაზრდავებულია. მათ ჯერ დრო სჭირდებათ“ – აღნიშნა ლევან მაისაშვილმა.
