საქართველოს ნაკრების ფეხბურთელი ჯანო ანანიძე საკმაო ხანია უგუნდოდაა. მან კარიერის ძირითადი ნაწილი რუსეთის პრემიერლიგაში გაატარა, სადაც „სპარტაკთან“ ერთად ჩემპიონიც გახდა.
ბოლო ხანს, ანანიძის კერიერა არეულია. ტრავმებმაც ხელი დარია, მარტის სანაკრებო მატჩებშიც ვილი სანიოლომ არ გამოუძახა, მაგრამ იმედია მალე ყველაფერი დალაგდება.
ამჟამად, ჯანო ანანიძე დინამო „ბათუმთან“ ერთად ვარჯიშობს და შესაძლოა მალე ზღვისპირელთა რიგებშიც ვიხილოთ. ყოველშემთხვევაში თავად ამას არ გამორიცხავს და სოციალურ ქსელში პოსტს აქვეყნებს.
„დავბრუნდი საქართველოში და ბათუმის „დინამოს“ ვთხოვე, მათთან ერთად მევარჯიშა. მოედანზე დაბრუნება ძალიან მინდოდა. ორ კვირაზე მეტია, „დინამოელებთან“ ერთად ვვარჯიშობ და მინდა, ფორმა აღვიდგინო. ზედმეტი კილოგრამები თითქმის დავიკელი.
შემოთავაზებები იყო თურქეთიდან, ყაზახეთიდან, ემირატებიდან, მაგრამ ჯერ არსად წასვლა არ მინდა, სანამ ოპტიმალურ ფორმაში არ შევალ. რაც შეეხება ბათუმში შესაძლო დარჩენას, ამის სურვილი ნამდვილად მაქვს, მაგრამ საბოლოო გადაწყვეტილება გუნდის დირექტორებმა უნდა მიიღონ.
ახლა სანაკრებო მატჩების ჯერი დგება და მინდა, ჩვენს ბიჭებს წარმატება ვუსურვო. მე კი ვეცდები, “დინამოს” რიგებში ამხანაგურ შეხვედრებში ვითამაშო, თუმცა ვარჯიში ერთია და კონტრაქტის გაფორმება – მეორე. თუ ხელშეკრულება გაფორმდა, ფეხბურთსა და ფორმის აღდგენაზე უფრო მეტს ვიფიქრებ. დიდი ალბათობით, ბათუმის “დინამოში” დავრჩები, თუ, რა თქმა უნდა, მადრიდის “რეალიდან” არ დამირეკეს” – აღნიშნავს ჯანო ანანიძე.
