დაფასებაც ასეთი უნდა. ის, რაც ქალაქ ნეაპოლის მუნიციპალიტეტმა გააკეთა, ნამდვილად იმსახურებს ქათინაურს. გამოჩენილ და დამსახურებულ ადამიანებს სამშობლოში ძეგლსაც უდგამენ და ეს ჩვეულებრივი მოვლენაა, მაგრამ უცხო ქვეყანაში რომ ისეთ სერიოზულ ნაბიჯს გადადგამენ, როგორც ეს ნეაპოლში გააკეთეს, მხოლოდ იმ უდიდეს სიყვარულზე მეტყველებს, რასაც დიეგო არმანდო მარადონასადმი გრძნობდნენ.
არადა, განა გაგვიკვირდა. დიეგოსაც ხომ არაერთხელ უთქვამს, ნეაპოლი ჩემი მეორე სახლიაო. რაც დიადმა არგენტინელმა „ნაპოლისთვის“ გააკეთა, არა მხოლოდ ადგილობრივების, ზოგადად საფეხბურთო სამყაროს მეხსიერებიდან არასოდეს წაიშლება. მას შემდეგ, ნეაპოლიტანელებს მსგავსი სიხარული აღარ განუცდიათ. იმ პერიოდში კი როდესაც მარადონა მათი საყვარელი გუნდის ღირსებას იცავდა, სხვა განზომილებაში იმყოფებოდნენ. ეს მათთვის ნამდვილი სიგიჟე იყო. 1984-1991 წლებში, მარადონას დამსახურებით ხომ „ნაპოლი“ ორჯერ გახდა იტალიის ჩემპიონი და უეფას თასიც დაისაკუთრა.
ჰოდა, ადგნენ და სტადიონს სახელი გადაარქვეს. ამიერიდან, „ნაპოლის“ არენას „სან-პაოლო“ აღარ ჰქვია, ის ოფიციალურად გახდა დიეგო არმანდო მარადონას სახელობის სტადიონი. ნეაპოლის მერიამ გადაწყვეტილება ოფიციალურად მიიღო და განაცხადა, რომ ქალაქის მერის, ლუიჯი დე მაჯისტრისის ინიციატივას მხარი მმართველი საბჭოს ყველა წევრმა დაუჭირა.
