კახელების წარმატებული სტარტი

საფეხბურთო კლუბი „თელავი“, რიგით 33-ე ეროვნულ ჩემპიონატს საკმაოდ მომძლავრებული შეხვდა. კახუხრმა გუნდმა ერთბაშად 15 ახალი ფეხბურთელი, მათ შორის ორი ბრაზილიელი ლეგიონერი დაიმატა, თუმცა პირველ ტურში გამარჯვებას მათ გარეშე მიაღწია.

რევაზ გოცირიძე, 20 წლის პაბლო კარნეირო ფრეიტასს და ჟონატა პერეირა დო სანტოსს თავის გამოჩენის შანსს ალბათ სხვა მატჩებში მისცემს, ჩემპიონატი ხომ ახლახანს დაიწყო და ჯერ პირველი ტურის შეხვედრები იმართება.

ჰოდა, თელაველი ფეხბურთელებიც ადგნენ და ჩემპიონატი გამარჯვებით დაიწყეს. მათ „სამტრედიას“ მინიმალური ანგარიშით – 1:0 მოუგეს. ნიშანდობლივია, რომ სამტრედიაში მწვრთნელად გია ცეცაძე დაბრუნდა, რომლის თავკაცობის დროსაც გუნდმა არნახულ წარმატებას მიაღწია და ქვეყნის ჩემპიონი გახდა.

თელაველთაგან, ერთადერთი გოლი პირველი ტაიმის მიწურულს შოთა შეყილაძემ გაიტანა და თავის გუნდს უმნიშვნელოვანესი 3 ქულა მოუტანა.