კვიპროსის ჩემპიონატის 25-ე ტურში „ქართულმა“ ფამაგუსტას ანორთოსისმა მეთერთმეტეადგილოსანი პარალიმნი 2:1 დაამარცხა.
პირველი ნახევარის 28-ე წუთზე, ანგარიში პენალტით თორნიკე ოქრიაშვილმა გახსნა, მან მეკარისგან დაბალ კუთხეში ძალიან მოხდენილი დარტყმა შეასრულა.
მეორე გოლი თოკომ 57-ე წუთზე შეაგდო, მას კარგი გადაცემა ებრაელმა დორ მიშამ გაუკეთა და გოლის გატანა არ გასჭირვებია.
აღსანიშნავია, რომ ის ძირითად შემადგენლობაში 8 ნოემბრის შემდეგ პირველად ვიხილეთ და მოედანი 76-ე წუთზე დატოვა.
გიორგი ლორიამ შეუცვლელად ითამაშა, გიორგი ქვილითაია სასტარტოში იყო და მე-80 წუთზე შეცვალეს, ბუბა დაუშვილი კი ტრავმირებულია.
ქართველების გუნდი 48 ქულით მეოთხე ადგილზეა, ლიდერ ომონიას 5 ქულით ჩამორჩება. 21 თებერვალს ანორთოსისი აპოლონს შეხვდება, რომლის ღირსებასაც გიორგი პაპუნაშვილი იცავს.
