თბილისის დინამო სოჭისთან დამარცხდა

თბილისის დინამომ თურქულ შეკრებაზე მორიგი სპარინგ-მატჩი გამართა. საქართველოს ჩემპიონის მეტოქე ამჯერად რუსული „სოჭი“ იყო.

შეიძლება ითქვას, რომ შეხვედრამ ფაქტობრივად რუსი ფეხბურთელების უპირატესობით ჩაიარა და მათი ლოგიკური გამარჯვებით, 3:0 დასრულდა.

ანგარიში შეხვედრის დაწყებიდან 10 წუთში, ეკვადორელი კრისტიან ნობოას გოლით გაიხსნა. ათიოდე წუთში სოჭის ფეხბურთელებმა საქართველოს მოქმედი ჩემპიონის კარში მეორე გოლი გაიტანეს. თავი ამჯერად ჟოაზინიომ გამოიჩინა.

რუსებმა საბოლოო ანგარიში შეხვედრის მიწურულს დააფიქსირეს. თბილისური გუნდის კარში გოლების გატანას წერტილი ტერეხოვმა დაუსვა.

სამწუხაროდ უნდა ითქვას, რომ მთელმა თამაშმა სოჭის უპირატესობით ჩაიარა და დინამოელებს მეტოქის კართან რეალური საგოლე მომენტი არ შეუქმნია.

გიორგი ნემსაძის გუნდი თურქულ შეკრებაზე ბოლო შეხვედრას 11 თებერვალს, უკრაინულ ვერეს წინააღმდეგ გამართავს, რომლის შემდეგაც დინამო საქართველოში დაბრუნდება.