“უიპეშტის” და საქართველოს ეროვნული ნაკრების თავდამსხმელმა, ბუდუ ზივზივაძემ Crystal Sport-თან ინტერვიუში რუსეთის უკრაინაში შეჭრაზე ისაუბრა და 2008 წლის აგვისტოს ომი გაიხსენა.
“პირდაპირ ვიტყვი, ახლა რუსეთში რომ ვთამაშობდე, ავდგებოდი და წამოვიდოდი. დღევანდელი მდგომარეობიდან გამომდინარე რუსეთში გაჩერება შეუძლებელი იქნებოდა. რაღაც პრინციპები უნდა გქონდეს. მით უმეტეს, როცა 2008 წელს რუსეთ-საქართველოს ომი იყო და რუსეთს საქართველოს ტერიტორიის 20 პროცენტი ოკუპირებული აქვს. პირადად მე რუსეთში ვერ გავჩერდებოდი.
2008 წელს პატარა ვიყავი, შეკრებას ჩაქვში გავდიოდით, მაშინ ინტერნეტი არ მქონდა, რომ ინტერნეტში მენახა სიახლეები, როგორც მაგალითად დღეს, როცა რუსეთი უკრაინაში ახორციელებს ინტერვენციას. მახსოვს, მშობლები რეკავდნენ მწვრთნელებთან და გვეუბნებოდნენ, რასაც რუსეთი ჩვენს მიმართ აკეთებდა. ამ ყველაფერს მთელი გუნდი ძალიან განვიცდიდით, ცოტა გვეშინოდა კიდეც, ძალიან პატარები ვიყავით. რა თქმა უნდა ცუდად მახსოვს, მთელი საქართველოსთვის ძალიან ცუდი მოგონებაა”, – განაცხადა ბუდუმ.
ცნობისთვის, ბუდუ ზივზივაძე ახალ კლუბს თებერვალში იჯარით შეუერთდა. ბუდუმ უნგრეთის ჩემპიონატში 4 მატჩი ჩაატარა და მის ანგარიშზე 5 გატანილი გოლია.
