2021 წლის მიწურულს, ვალენსაიმ გიორგი მამარდაშვილი თბილისის „დინამოდან“ ოფიციალურად გამოისყიდა. „ღამურებმა“ ქართველი ფეხბურთელის ტრანსფერში 850 ათასი ევრო გადაიხადეს.
დღეს, ხოსე ბორდალასის გუნდი კოპა დელ რეის 1/16 ფინალური ეტაპის შეხვედრას გამართავს. თბილისის დროით 19:00 საათზე, „ვალენსია“ სტუმრად „კარტახენას“ დაუპირისპირდება.
მატჩისწინა პრესკონფერენციაზე ბორდალასს ჟურნალისტებმა გიორგი მამარდაშვილის შესაძლო განათხოვრების შესახებ ჰკითხეს, რაც 57 წლის სპეციალისტმა კატეგორიულად გამორიცხა:
„გიორგი არის ფეხბურთელი, რომელიც ჩვენთან ზაფხულში მოვიდა და ყველა გააოცა. მას დრო მივეცით და მართლაც კარგად თამაშობდა. მამარდაშვილი ახალგაზრდაა და ბევრი უნდა იშრომოს. ფაქტია, მას დიდი პოტენციალი აქვს. კარგად ვარჯიშობს და კარგად მუშაობს, ჩვენ მის განათხოვრებაზე არ ვფიქრობთ, რადგან სეზონი გრძელია, კალენდარი კი – ძალიან გადატვირთული. მასაც ისეთივე შანსი აქვს, როგორც სხვა მეკარეებს. ისეთ გუნდს, როგორიც ვალენსიაა, მინიმუმ 3 კარგი მეკარე უნდა ჰყავდეს“, – ამბობს ბორდალასი.
