საქართველოს ნაკრებისა და „შტურმის“ ნახევარმცველის, ოთარ კიტეიშვილის ტრავმის სიმძიმე ცნობილია. ავსტრიული პრესის მტკიცებით, 27 წლის ფეხბურთელს მარჯვენა ფეხზე კოჭის მყესი აქვს გაწყვეტილი, რის გამოც 3-4 თვე უქმობა მოუწევს.
Kleinezeitung.at-ის ინფორმაციით, კიტეიშვილს შაბათს ოპერაცია ჩაუტარდება. ფეხბურთელის მდგომარეობასთან დაკავშირებით, სააგენტო „შტურმის“ სპორტული დირექტორის კომენტარსაც ავრცელებს.
„ოთარი ჩვენთვის ერთ-ერთი ყველაზე მნიშვნელოვანი მოთამაშე და შემტევი ძალაა. მისი ტრავმა სერიოზულია, რაც ყველასთვის ძალიან სამწუხაროა. მისი უიღბლობა ყველას ძალიან გვტკივა“, – ამბობს ანდრეას შიკერი.
შეგახსენებთ, რომ კიტეიშვილმა ტრავმა ევროპა ლიგის ჯგუფური ეტაპის მეორე ტურში, პსვ-სთან მატჩში მიიღო. ქართველმა ფეხბურთელმა მოედანი მე-80 წუთზე სამედიცინო პერსონალის დახმარებით დატოვა. სამწუხაროდ, ოთარ კიტეიშვილი საქართველოს ნაკრების ოქტობრის და ნოემბრის თამაშებსაც გამოტოვებს.
