ესპანური გამოცემა Eldesmarque „ვალენსიაში“ გიორგი მამარდაშვილის მდგომარეობას გამოეხმაურა და დაწერა, რომ მისთვის მნიშვნელოვანი მადრიდის „რეალთან“ მატჩი იქნება, სადაც მას წინა ტურებთან შედარებით, გაცილებით მეტი სამუშაო ექნება.
„ვალენსიაში გიორგი მამარდაშვილის პოზიციები ისევ მყარია. გუნდმა ლა ლიგაში მორიგი მატჩი მოიგო და მართალია, მამარდაშვილი ისეთივე შთამბეჭდავი არ ყოფილა, როგორც სადებიუტო თამაშში, თუმცა ის კვლავ გუნდის ძირითად მეკარედ მოიაზრება. ახალმა მწვრთნელმა გუნდში რევოლუციური ცვლილებები განახორციელა და ერთ-ერთი მათგანი სწორედ მეკარის პოზიციაა. მამარდაშვილმა სილესენი მოკლე დროში ჩაანაცვლა და როგორც ჩანს, ახლო პერიოდშიც არაფერი შეიცვლება.
ოსასუნასთან მატჩი მამარდაშვილისთვის ზედიზედ მე-4 იყო და ვერ ვიტყვით, რომ უშეცდომო იყო. ალბათ, მონკაიოლას დარტყმის დროს უკეთ გარჯა მართებდა, თუმცა იმის თქმა, რომ გოლი მისი ბრალი იყო, არასწორია. ნათელია, რომ სეზონის მიმდინარეობისას გიორგის უფრო უხეში შეცდომებიც ექნება და ამაში გასაკვირიც არაფერი, რადგანაც მხოლოდ 20 წლისაა. ნამდვილად მიშვნელოვანია მომდევნო ტურში რეალთან მატჩი. ვნახოთ, მამარდაშვილი იქ რას იზამს.
ვალენსიას კარის დარაჯმა ოთხივე შეხვედრაში შეუცვლელად ითამაშა და მხოლოდ 2 გოლი გაუშვა. საშუალო სტატისტიკის გამოყვანაც ძალიან მარტივია – 0.5 გოლი თამაშში. ასეთივე შედეგი აქვს ელჩეს მეკარე კიკო კასილიასაც, თუმცა, მის გუნდს მხოლოდ 1 მოგება აქვს“, – წერს ესპანური გამოცემა.
„ვალენსია“ ლა ლიგაში მომდევნო შეხვედრას 19 სექტემბერს, საკუთარ მოედანზე მადრიდის „რეალის“ წინააღმდეგ გამართავს.
